Vaktsınatsııa aýrýdyń aýyr ótýine jol bermeıdi – ázerbaıjandyq dáriger
Mamandardyń aıtýynsha, koronavırýsqa qarsy vaktsınanyń úshinshi dozasy ınfektsııadan qorǵanýdy arttyrady jáne jalpy vaktsınatsııa aýrýdyń aýyr ótýine jol bermeıdi.
«Aýrýdy juqtyrýshylar sanynyń ósý sebebi – sońǵy ýaqytta adamdar aýrýǵa salǵyrt qarap júr. Qoǵamdyq oryndarda maska taqpaý jáne shekteýlerdi jeńildetý de aýrý sananyń ósýine yqpal etken faktorlar qatarynda. Meniń oıymsha, eger jaǵdaı osy baǵytta damıtyn bolsa, onda burynǵydaı qatań bolmasa da, belgili bir shekteýler engizilýi múmkin. Koronavırýspen kúresýdiń jalǵyz ádisi - vaktsınalaý. Aýyr jaǵdaıdaǵy naýqastardyń basym kópshiligi vaktsınalanbaǵan, al qaıtys bolǵandardyń arasynda bul kórsetkish 95 paıyzǵa teń. Kúzge qaraı bul kórsetkishter odan ári artady», - dedi Nıgıar Alıeva.
Aıta keteıik, sońǵy ýaqytta Ázerbaıjanda COVID-19 juqtyrǵandar sany ósip jatyr. Eldiń mınıstrler kabıneti janyndaǵy jedel shtabynyń málimetinshe, aýrý juqtyrǵandar sany keshe 1101 jaǵdaıǵa jetken. 9 adam qaıtys bolǵan.
Ázerbaıjan úkimeti osyǵan baılanysty azamattardy vaktsınalaý protsesine belsendi qatysýǵa shaqyryp jatyr.
Ázerbaıjan Eńbek jáne halyqty áleýmettik qorǵaý mınıstrligi málim etkendeı, ázerbaıjandyqtar 16 tamyzdan bastap kovıd-pasporty bolsa nemese COVID-19-dan jazylǵannan keıin ımmýnıteti qalyptassa ǵana áleýmettik qyzmetterdi paıdalana alady.
Budan bólek, 2021 jyldyń 1 qyrkúıegine deıin eldiń memlekettik qurylymynda jumys isteıtinderdiń kem degende 80%-y vaktsınanyń bir dozasyn alýy kerek, al 2021 jyldyń 1 qazanyna deıin memqyzmetkerlerdiń kem degende 80%-y tolyq vaktsınalanýy tıis. Sondaı-aq, 1 qyrkúıekten bastap jabyq keńistikte jumys isteıtin qoǵamdyq tamaqtaný obektilerine, qonaqúılerge, iri saýda ortalyqtaryna COVID-pasporty bolǵan jaǵdaıda ǵana kirýge bolady.
Avtory: Serikbol Qoshmaǵanbetov
