Vaktsınatsııa: Almatylyqtarǵa medıtsınalyq aqparat júıesi arqyly shaqyrtý jiberilip jatyr
ALMATY. QazAqparat - Almaty qalasy №17 emhananyń dáriger-epıdemıology Galına Rogatovskaıa vaktsınatsııa barysy týraly aıtty, dep habarlaıdy QazAqparat tilshisi.
«Bastapqyda biz medıtsına qyzmetkerlerin, mektep, ınternat muǵalimderin, áleýmettik mekemeler jáne polıtsııa qyzmetkerlerine vaktsına saldyq. Olarǵa ekpe salý aıaqtalyp keledi. 2 sáýirden bastap sozylmaly aýrýy bar dıspanserlik toptaǵy patsıentterdi vaktsınalaýǵa kiristik», - dedi Galına Rogatovskaıa.
Epıdemıolog dáriger olardyń otandyq vaktsınanyń 2200 dozasyn alǵanyn jáne onymen sátti jumys istep jatqanyn aıtty.
«Vaktsınany kvınkı isinýi bar, júkti jáne bala emizetin áıelderge jasamaǵan jón. Sonymen qatar, vaktsınatsııaǵa 18 jasqa deıingi balalar jiberilmeıdi. Koronavırýsqa qarsy vaktsınany 63 jastan asqan adamdarǵa jasaýǵa ruqsat etiledi»,-deıdi dáriger.
Onyń aıtýynsha, vaktsına ár adamǵa árqalaı áser etýi múmkin.
«Vaktsına salǵanan keıin úsh kún ishinde keri áseri bolýy múmkin jáne olardy asqyný dep ataýǵa kelmeıdi. Bul - qaltyraý, deneniń syrqyraýy, dene temperatýrasynyń azdap kóterilýi. Bizdiń derekterimiz boıynsha, ekpe saldyrǵandardyń 25-30%-da osy belgiler baıqalyp otyr. Qalǵandar shaǵymdanǵan joq. Aýyr belgileri de tirkelgen joq», - dedi ol.
Sonymen qatar, ol turǵyndarǵa medıtsınalyq aqparattyq júıe arqyly shaqyrtý jiberilgenin atap ótti.
«Halyqqa ekpe júrgizý 2 sáýirde bastaldy, oǵan deıin sozylmaly aýrýy bar naýqastarǵa medıtsınalyq aqparattyq júıe arqyly shaqyrý jiberilgen bolatyn. Eki kúnde 1300 adam egildi. Vaktsına saldyrǵandar qatarynda sheteldik azamattar da bar»,- dep túıindedi dáriger.
