Vaktsına vırýstan 100% qorǵamaıdy, biraq aǵzany sol vırýspen kúresýge daıyndaıdy - dáriger
NUR-SULTAN. QazAqparat - Elordalyq №10 emhananyń aldyn alý qyzmetiniń basshysy Danııar Qabykenov vaktsına - pandemııamen kúrestegi jalǵyz qarý ekenin aıtty, dep habarlaıdy QazAqparat ákimdiktiń resmı saıtyna silteme jasap.
Qazir álemde halyqty vaktsınatsııalaý jumysy qarqyndy júrgizilip jatyr. Keıbir elderde ımmýndaý júıesi tipti mindetteldi. Vaktsına ondaǵan jyldar boıy adam ómirin qaýipti aýrýlardan aman saqtap kele jatqanmen onyń tıimdiligine kúmán keltiretinder bar. №10 qalalyq emhananyń aldyn alý qyzmetiniń basshysy Danııar Qabykenov vaktsına pandemııamen kúrestegi jalǵyz qarý bolyp sanalatynyn aıta kele onyń qandaı prıntsıp boıynsha jumys isteıtinin túsindirip berdi.
Danııar Qabykenovtiń aıtýynsha vaktsına kez kelgen vırýstan 100% qorǵamaıdy. Biraq aǵzany sol vırýspen kúresýge daıyndaıdy.
«Vaktsınanyń quramyna aýrýdy týdyratyn belsendi emes mıkroorganızmder kiredi. Osynyń arqasynda ımýndy júıe aǵzaǵa engen qaýipti sezip, antıdene bóledi. Bul qaýipti vırýspen kúresýge múmkindik beredi. Vaktsınanyń ózi aýrý qozdyrǵysh bola almaıdy. Degenmen vaktsınatsııanyń keıbir jaǵdaılarynda dene qyzýy kóterilýi, álsireýi, ıne salǵan jeri isýi múmkin. Al eń bastysy – adam vaktsınanyń arqasynda aýrýǵa qarsy ımmýnıtet alady. Mine, dál osy sebepti vaktsına túrli aýrýlarmen kúresýdiń tıimdi ádisi bolyp sanalady. Ol vırýstyń adam azǵasynda ósýine jol bermeıdi», - deıdi ol.
Adam ımmýndaýdan tolyq ótkenmen vırýs juqtyrýy múmkin.
Biraq vaktsına alǵan patsıent ınfektsııa juqtyrǵan jaǵdaıda ekpe almaǵandarmen salystyrǵanda aýrýdy jeńil ótkizedi.
Oǵan dálel – tumaýǵa qarsy vaktsına. Vaktsınatsııadan keıin adam tumaýmen aýyrǵan jaǵdaıda eshqandaı asqynýsyz, jyldam emdeledi.
