Vaktsına týraly aqparatty senimdi derekkózden oqý kerek – sarapshy
NUR-SULTAN. QazAqparat – Vaktsına ǵana ınfektsııany toqtatyp, ólim-jitimdi azaıta alady. Bul pikirdi QR DSM Ulttyq qoǵamdyq densaýlyq saqtaý ortalyǵy Sanıtarlyq-epıdemıologııalyq saraptama jáne monıtorıng ǵylymı-praktıkalyq ortalyǵy dırektorynyń orynbasary Manar Smaǵul aıtty, dep habarlaıdy QazAqparat tilshisi.
«Vaktsınatsııa – eń tıimdi sharalardyń biri. Tek vaktsına ólim-jitim men ınfektsııanyń taralýyn azaıta alady. Vaktsına arqyly erkindikke qol jetkizemiz. Buǵan deıin de aıtqanymdaı, shekteýlerdi azaıtýǵa bolady. Bálkim kúzde maskany sheshetin shyǵarmyz. Onyń ústine kúzde balalardy mektepke qaıtarý múmkindigi de talqylanyp jatyr. Onlaın emes, offlaın kezdesýler ótkizerimizge úmittenemin», - dedi M. Smaǵul Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, halyqty ashyq habardar etý qajet. Barlyq derekter men aqparatty senimdi kózderden jáne quzyretti mamandardan alý kerek.
«Sebebi qazir áleýmettik jelide vaktsınatsııaǵa qatysy joq eki-úsh jyl burynǵy beınelerdi, fotolardy baıqaımyz. Tek senimdi aqparatqa súıený kerek. Reseılik «Spýtnık V» vaktsınasyna kelsek, reseılik áriptester qyzarý, temperatýranyń joǵarylaýy túrinde asqynýlar bolady deıdi, olar birneshe kúnnen keıin ketedi. Qorytyndylaı aıtqanda, vaktsınanyń paıdasy kóp, óıtkeni ol bizdi aýrýdan qorǵaıdy», - deıdi Manar Smaǵul.
