Vaktsına saldyratyn kezde turǵyndarǵa tańdaý bar – dáriger

AQTÓBE. QazAqparat – Aqtóbe oblysy boıynsha 356 myńnan astam adam vaktsınanyń eki komponentin de saldyrdy. Qazirgi kezde vaktsına, revaktsınalaý kezinde tańdaý jasaýǵa múmkindik bar, dep habarlaıdy QazAqparat tilshisi.

Aqtóbe oblysynda bir táýlikte 467 adamnan koronavırýs ınfektsııasy anyqtaldy.

Onyń 326-y vırýstyń sımptomdy túrine shaldyqqan.

Qazirgi kezde nasqastarmen baılanysta bolǵan adamdar sany 10 myńnan asyp, olar úı karantıni shekteýin saqtap otyr.

Aqtóbe oblystyq sanıtarııalyq-epıdemıologııalyq baqylaý departamenti baspasóz qyzmetiniń habarlaýynsha, búginge deıin 40 myńnan astam adamnan koronavırýs ınfektsııasy anyqtalsa, onyń 85,5% jazylyp shyqty.

Qazirgi kezde turǵyndardy ımmýndaý sharasy jalǵasyp jatyr.

№6 qalalyq emhanada 35 myńǵa jýyq tirkeýde bolsa, onyń 13 myńnan astamy vaktsına saldyrdy.

«Koronavırýs ınfektsııasynyń aldyn alýdyń eń birinshi joly vaktsına, jeke qorǵanysh quraldary ekeni belgili. №6 qalalyq emhanada qazir 35 myńǵa jýyq turǵyn tirkelgen. Qazir olardyń arasynda ımmýndaý sharasy barynsha qarqyndy júrip jatyr. Byltyrǵa qaraǵanda turǵyndardyń kózqarasy ózgerdi, kóbi óz erkimen keledi. Qazirgi kezde 13 200-den astam adam vaktsına saldyrdy. Al 1500 turǵyn revaktsınalaýdan ótti. Barlyq vaktsınalaý jumysy emhananyń ekpe bólmesinde ótip jatyr. Adam aldymen dárigerdiń qabyldaýyna barady. Qarsy kórsetkishtiń bar-joǵy anyqtalady. Eger bolmasa, vaktsına salady. Olar Spýtnık V, QazVac, Vero Sell paıdalanyp jatyr. Revaktsınaǵa QazVac, Spýtnık Laıt bar. Kez kelgen turǵynǵa tańdaý jasaýǵa múmkindik beriledi. Ásirese qazaqstandyq ónimge suranys kóp. Endi dárigerler, ýchaskelik dárigerler 60 jastan asqan adamdar men jasóspirimder, bala emizetin analar arasynda túsindirý jumysyn kúsheıtti», - dedi №6 qalalyq emhana dárigeri Ádilbek Ismaılov.