Vaktsına pasportyn qoldan jasaý boıynsha 60-tan astam qylmystyq is qozǵalǵan

NUR-SULTAN. QazAqparat – Vaktsına pasporty vırýstan qorǵaı almaıdy. Ony qoldan jasatqandardyń bári túbi bir áshkere bolady. Densaýlyq saqtaý mınıstri Alekseı Tsoı qazaqstandyqtarǵa osyndaı úndeý tastady, dep habarlaıdy QazAqparat tilshisi.

«Qazir vaktsına pasportyn qoldan jasaý áreketterimen qatty kúresip jatyr. Biz bul iske quqyq qorǵaý organdaryn aralastyrý týraly bastama kótergen bolatynbyz. Memleket basshysy bul máselemen naqty aınalysýdy tapsyrǵanyn bilesizder. Qazirdiń ózinde 60-tan astam qylmystyq is qozǵaldy. Mundaı áreketterdiń joly qatań túrde kesilip jatyr. Jarnamalaǵan saıttar birden buǵattalýda. Ony ornalastyrǵan adamdar qylmystyq qýdalaýǵa alynady. Qazir vaktsına pasportyn jarnamalaǵan málimetter saýsaqpen sanaıtyndaı deńgeıge túskenin kórip otyrmyz. Árbir jarnama joıylyp, onyń artyndaǵy adamdy anyqtaýǵa jedel ýákilder kirisip jatyr. Qazir usynystardyń sany azaıdy. Óıtkeni qatań sharalar qabyldanyp jatyr. Buǵan deıin sanasyna jetpegender bul áreket qatty qýdalanyp jatqanyn túsindi», - degen mınıstr jalǵan vakına pasportyn satyp alýdy oılap júrgenderge qaıyryldy.

«Jalǵan pasport adamdy koronavırýstan qorǵamaıdy. Reanımatsııaǵa túsýden qorǵaıtyn qabileti joq jalǵan qujattyń. Bul óz-ózińdi aldaý ǵana. Jalǵan qujat jasatqandardyń bári erte me, kesh pe, bári bir áshkere bolady. Óıtkeni biz sáıkestendirý jumystaryn júrgizip jatyrmyz. Vaktsına satyp alýǵa tyrysqandardyń bári qatań jazalanatyn bolady. Barsha azamattardy tártip saqtap, zańnan attamaýǵa úndeımin», - dedi vedomstvo basshysy.