Vaktsına ońtaıly nátıje berdi - depýtat
NUR-SULTAN. QazAqparat – QR Parlamentiniń depýtaty Záýresh Amanjolova «Halyq densaýlyǵy jáne densaýlyq saqtaý júıesi týraly» kodeks jobasynda vaktsınalaýǵa qatysty ózgerister boıynsha pikir bildirdi, dep habarlaıdy QazAqparat tilshisi.
«Kóptegen pikirler aıtylǵanyn bilesizder, óziniń mańyzdylyǵy boıynsha Kodekstiń tıisti dárejesi bar. Osy oraıda bul máselege nazar aýdaryp, talqylaýǵa qatysqandarǵa alǵysymdy aıtamyn», - dedi depýtat Qazaqstandaǵy mindetti ekpe máselesin talqylaýǵa arnalǵan onlaın konferentsııada.
Onyń atap ótýinshe, vaktsına elimizde óte jaqsy nátıje berdi. Osy oraıda birneshe aýrýlardy joıýǵa múmkin boldy.
«Kodeksti talqylaý barysynda úsh myńnan astam usynys kelip tústi. Salystyrmaly kestede 1,5 myńǵa jýyǵyn qaradyq jáne 717 túzetý maquldandy. Bul óz kezeginde eń aýqymdy zań jobalarynyń biri boldy. Belsendi qatysqan adamdardyń arqasynda osy qujatqa kóptegen ózgertýler engizildi», - dedi depýtat.
Osy oraıda ol Kodekste ekpeler mindetti jáne erikti bolyp jiktelgenin eske saldy.
«Biz osyny zańnamalyq deńgeıde bóldik. Shyn máninde tizimdi ókiletti organ bekitedi. Qoǵamdaǵy rezonansty tyńǵylyqty zerttedik. Negizgi sebeptiń biri - ekpe sapasyna qatysty. Zań jobasynda óndirýshilerge baılanysty jazalaýdyń qatań sharalaryn qarastyrdyq. Eger olardyń kinási dáleldense, tolyqtaı jaýap beredi. Sonymen qatar, vaktsınany tasymaldaý, saqtaý, sondaı-aq ekpe jasaý kezindegi medıtsınalyq personaldyń jaýapkershiligi eskerilgen», - dedi Z. Amanjolova.
