Vaktsına óńirlerge ýaqytyly jetkiziledi - Alekseı Tsoı

NUR-SULTAN. QazAqparat – Koronavırýsqa qarsy vaktsına kestege sáıkes jetkizilip, óńirler suranysy qamtamasyz etiledi. Bul týraly QR Densaýlyq saqtaý mınıstri Alekseı Tsoı málim etti, dep habarlaıdy QazAqparat tilshisi.

«Birinshiden, jetkizilim kestesi boıynsha bizde vaktsınanyń árbir partııasy birtindep kelip jatyr. Ekpe saldyrǵan adamdar kórsetkishi erikti túrde barǵandar sanyna qatysty bolyp otyr. Qazirgi kezde vaktsına saldyrýǵa barǵandar sany artyp kele jatqanyn baıqap otyrmyz. Vaktsınalar josparly túrde jetkiziletinin atap ótken jón. Ár óńir boıynsha naqty bekitilgen kólem bar. Sondyqtan eshqandaı problemany kórip turǵanym joq. Vaktsına ýaqytyly jetkizilip, óńirler qajettiligi qamtamasyz etiledi», - dedi A. Tsoı Ortalyq kommýnıkatsııalar qyzmetinde.

Osy oraıda ol vaktsınalaý elimizde erikti túrde júrgiziletinin jáne osy baǵytta túsindirý jumystary júrgizilip jatqanyn atap ótti.

Budan buryn habarlanǵandaı, QR Densaýlyq saqtaý mınıstri Alekseı Tsoı koronavırýsqa qarsy vaktsınanyń birinshi jáne ekinshi komponenti qansha adamǵa salynǵanyn aıtty.