Vaktsına óndirýmen nelikten Bilim mınıstrligi aınalysady

NUR-SULTAN. QazAqparat – Koronavırýsqa qarsy vatsınany jappaı óndirýmen nelikten Densaýlyq saqtaý mınıstrligi emes Bilim jáne ǵylym mınıstrligi aınalysady? Bul saýalǵa QR Densaýlyq saqtaý birinshi vıtse-mınıstri Marat Shoranov jaýap berdi, dep habarlaıdy QazAqparat tilshisi.

«Vaktsınany ázirleýshi ınstıtýt Bilim mınıstrligine qarasty uıym sanalady. Sondyqtan biz, densaýlyq saqtaý júıesi retinde atalǵan vaktsınanyń tıimdiligin baqylaýǵa jáne olardy naryqqa jiberýge qatysamyz. Bul jalpy álemdik tájirıbe sanalady. Densaýlyq saqtaý mınıstrliginiń quziretin óndirý kirmeıdi», - dedi ol Ortalyq kommýnıkatsııalar qyzmetindegi baspasóz máslıhaty barysynda.

Birinshi vıtse-mınıstr qazaqstandyq vaktsınany shyǵarýǵa Densaýlyq saqtaý mınıstrligi qandaı kómek kórsetetindigin de aıtyp berdi.

«Dárilik zattardy saraptaý ortalyǵymyz klınıkalyq synaqtyń barlyq satysynda saraptama júrgizip, nátıjesinde sarapshylyq qorytyndy beredi. Komıssııa qorytyndysy jasalady. Sodan keıin atalǵan preparatty Medıtsınalyq-farmatsevtıkalyq baqylaý komıtetinde tirkeý júrgiziledi», - dedi Marat Shoranov.