Vaktsına nege erte shyqpady dep ókinetinder bar - ınfektsıonıst
NUR-SULTAN. QazAqparat – Nur-Sultan qalasynyń Kópbeıindi medıtsınalyq ortalyǵy dırektorynyń orynbasary Sáýle Atyǵaeva indetpen kúreske kirisken 15 aıda ózi sezingen emotsııalar týraly baıandady, dep habarlaıdy QazAqparat tilshisi.
«Meniń koronavırýsqa arnalǵan gospıtalde jumys istep júrgenime 15 aı boldy. Myńdaǵan adamdy emdep shyǵardyq. Ókinishke qaraı, joǵaltqan adamdar da kóp. Olardyń arasynda dáriger áriptesterimiz de, týysqandarymyz da bar. Sáýir aıynda syrqattanýdyń erekshe óskenin baıqaǵanymyzdy aıtqym keledi. Qańtar aıyna qaraǵanda aýrý juqtyrý kórsetkishi 3-4 esege artty. Ólim kórsetkishi 5 esedeı ósti. Qańtarda 22 adam qaıtys bolsa, sáýirde 104 adam kóz jumdy. Onyń bári bireýdiń ata-anasy, bireýdiń jaqyn týysy, bireýdiń dosy, áriptesi», - deıdi ınfektsıonsıt.
Ortalyq ókili koronavırýstan kóz jumǵan adamdardyń týystary kóbinese vaktsına nege erte shyqpady dep ókinetinin aıtady.
«Qaıtys bolǵan adamnyń súıegin áketýge kelgen adamdardy kórý bizge óte aýyr. Sol adamdardyń aýzynan «Átteń, vaktsına nege erterek paıda bolmady eken? Vaktsına bolyp, ata-anamyzǵa ekpe jasatqanda qazir aman-esen telefonmen sóılesip otyratyn edik. Búgin olardy zıratqa emes, saıahatqa apara jatatyn edik» degen ókinishterdi jıi estımiz», - deıdi maman.
Ol, sondaı-aq, ár naýqasty emdeý el ekonomıkasyna da salmaq salyp jatqanyn eskertti
«Qazir árkimniń aldynda tańdaý tur. Ne aýyryp emdelý, ne aýyrmaı ekpe alý kerek. Aýrýdy juqtyrý ońaı bolǵanymen, odan emdelý ońaı emes. Statsıonarǵa túskennen keıin qulan taza aıyǵyp shyǵýdyń ózi qıyn sharýa. Ár naýqasty emdep shyǵýdyń quny da qymbatqa túsip jatyr. Kóptegen qan taldaýlaryn jasaýǵa májbúrmiz. Óıtkeni bul vırýs burynǵylardan múlde bólek», - degen ınfektsıonıst postkovıdtik sındromdardyń qanshalyqty qaýipti ekenine toqtaldy.
«Bul vırýs adam denesindegi kóptegen organdardy zaqymdaıdy. Áýeli ókpeni, odan keıin júrekti, asqazan men ótti zaqymdaıdy. Kóptegen naýqas ómirinde alǵash ret qant dıabetine shaldyǵyp jatyr. Mı da, búırek pen qantamyrlar qatty shabýylǵa ushyraıdy. Tipti jolyńyz bolyp, em tıimdi júrip, aǵzańyz qarsy turyp jazylyp shyqtym degenniń ózinde qalypty ómirge orala almaýyńyz múmkin. Óıtkeni «poskovıd sındromy» degen túsinik bar. 2 aptadan keıin, keıde tipti 3 aıdan keıin qıyndyqtar týyp, júrek, mı, búırek, baýyr sııaqty organdar syr berýi múmkin. Aýrýdan keıin múgedek bolyp qalýdyń qaýpi joǵary. Al jolyńyz bolmasa, jan tapsyrýyńyz da múmkin.
Sondyqtan aýrýdyń aldyn alýdyń qamyn oılaý kerek. Iá, ókinishke qaraı aýrýdyń betin qaıtaratyn quralymyz az shyǵar. Sonyń ishindegi er qoljetimdi ári tıimdi joly –vaktsına», - dedi Sáýle Atyǵaeva
Nur-Sultan qalasy ákiminiń orynbasary Baqtııar Mákenniń aıtýynsha, sáýir aıynyń basynan beri elordada 100 myńnan astam adam vaktsına alyp úrgergen.
