Vaktsına - koronavırýstyq ınfektsııadan saqtanýdyń birden-bir joly — Nurbek Nyshanov
TÚRKІSTAN. QazAqparat - Túrkistan oblysynyń bas sanıtar dárigeri óńir turǵyndaryna arqany keńge salýǵa bolmaıtynyn eskertedi. Nurbek Nyshanovtyń aıtýynsha, karantındik talaptardy oryndamaý azamattardyń jappaı aýrýǵa shaldyǵýyna ákelip soǵýy múmkin, dep habarlaıdy QazAqparat tilshisi.
Ótken aıda eki ret vaktsına qabyldaǵan departament basshysy aımaqtyń jasyl aımaqtar tiziminde bolǵanymen, kórshiles qalalar men oblystardaǵy jaǵdaılardyń kúrdelenýi alańdatyp otyrǵanyn aıtady. Sondyqtan saqtyq sharalaryn kúsheıtken jón dep otyr. Al, koronovırýstyq ınfektsııadan saqtanýdyń birden-bir joly vaktsına ekendigin málimdeıdi.
«Sońǵy eki aptada óńirde koronovırýs 36 %, pnevmonııa 54 % óskeni baıqalady. Karantındik talaptardy oryndamaý, ıaǵnı betperde taqpaý, toı-jıyndarǵa, kópshilik jınalatyn jerlerge barý, sondaı-aq úı-jaǵdaılarynda da qarapaıym talaptardy saqtamaý syndy sebepter azamattardyń aýrýǵa shaldyǵýyna ákelip otyr. Jyl basynan beri oblysta koronavırýstyq ınfektsııanyń rastalǵan 818 jaǵdaıy tirkeldi. Naýryz aıynyń 30-31 kúnderi KVI-diń 15 jaǵdaıy tirkelse, pnevmonııamen 28 azamat tirkeldi. Osy ýaqytqa deıin oblysta Covid-19 koronavırýsty ınfektsııadan 4493 jaǵdaı rastaldy. Jyl basynan beri 625 pnevmonııa aýrýshańdyǵy tirkeldi», - deıdi Nurbek Nyshanov.
Oblystyń bas sanıtar-dárigeri sondaı-aq, turǵyndar arasynda otbasylyq, merekelik is-sharalardy uıymdastyrý tolastamaı turǵanyn alǵa tartady. Máselen, jyl basynan beri óńirde jasyryn 192 merekelik is-shara uıymdastyrylǵany belgili boldy.
«Sondyqtan óńir halqyn óz densaýlyqtaryna jaýapkershilikpen qarap, vaktsına saldyrýdan qoryqpaý qajet. Aımaqta qazirgi tańda 12700 azamat óz erikterimen covid-19-ǵa qarsy ekpe qabyldady. Sáýir aıynda óńirge 10700 dozasy keledi dep kútilýde»,- dedi Nurbek Nyshanov.
