Vaktsına koronavırýs ınfektsııasyn jeńil ótkerýge kómektesedi – epıdemıolog

Aqtóbelik epıdemıolog, ınfektsıonıst pen dárigerler eldegi úsh túrli vaktsınanyń tıimdiligin turǵyndarǵa túsindirdi. Máselen Reseı ǵalymdary oılap tapqan «Spýtnık V» vaktsınasy - adenovırýs negizinde jasalǵan. Sóıtip adenovırýsqa koronavırýstyń aqýyzy engizilip, vaktsına alyndy. Qazirgi kezde «Spýtnık V» vaktsınasy Qaraǵandy farmatsevtıkalyq kesheninde shyǵarylady. «QazVac» jáne «Hayat Vax» vaktsınalary – ınaktıvatsııalanǵan vaktsına, ıaǵnı, koronavırýstyń joıylǵan vırýsy qoldanylǵan. «Spýtnık V» vaktsınasynyń tıimdiligi 92%, «QazVac» 96%, «Hayat Vax» ekpesiniń tıimdiligi 79%.
«Kez kelgen adam vaktsına saldyrmas buryn dárigerge qaralady. Ádettegideı dene qyzýy ólshenip, suraqqa jaýap beredi. Dáriger teksergennen keıin ǵana vaktsına qabyldaýǵa bolady nemese qarsy kórsetkishi bar ekenin aıtady. Allergııa, qant dıabetine, qan qysymynyń kóterilýine qarsy kórsetkish joq. Bul dertke shaldyqqandar da vaktsına saldyrsa bolady. Biz vaktsına arqyly ujymdyq ımmýnıtetti qalyptastyryp, qalypty ómirge bir taban jaqyndaı túsemiz. Sózimizge qazirgi Izraıldegi jaǵdaı dálel. Ol elde 2020 jyldyń jeltoqsan aıynda vaktsınatsııalaý bastaldy. Al bıyl sáýirde maska taǵý sekildi birqatar shekteýdi alyp tastady», - dedi M.Ospanov atyndaǵy Batys Qazaqstan medıtsına ýnıversıteti epıdemıologııa kafedrasynyń meńgerýshisi Saltanat Orazbaeva.
Vaktsınanyń birinshi dozasyn saldyrǵanda adam aǵzasynda ımmýnıtet qalyptasady. Ekinshi doza adam aǵzasyndaǵy antıdenelerdiń mólsherin kóbeıtip, birinshi dozanyń áserin kúsheıtedi
«Vaktsına saldyrǵan adam koronavırýs ınfektsııasyn jeńil ótkeredi. Aýyr jáne ortasha aýyrlyqta ótýden qorǵaıdy. Qazir bizde derttiń aýyr túrine shaldyqqandar kóp. Sonymen birge vaktsına aldynda ár adam qol qoıady. Eger qujatqa qol qoıylmasa, vaktsına jasalmaıdy. Bul májbúrleý týraly kóp suraqtyń jaýaby», - dedi Saltanat Orazbaeva.