Vaktsına indetten bolatyn ólim deńgeıin tómendetedi - qytaılyq sarapshy

BEIJІŃ. QazAqparat – Koronavırýsqa qarsy vaktsınalardyń paıda bolýynyń arqasynda álemde COVID-19-dan bolatyn ólim-jitim deńgeıi 1%-ǵa deıin tómendeıdi, dep habarlaıdy QazAqparat tilshisi jergilikti BAQ-qa silteme jasap.

Shanhaıdaǵy koronavırýstan emdeý jónindegi saraptamalyq toptyń jetekshisi Chjan Veıhýnnyń aıtýynsha, «vaktsınalardyń paıda bolýy ekonomıkalyq turǵydan damymaǵan elder men aımaqtardaǵy medıtsınalyq júıeniń júktemesin edáýir qysqartady. Sondaı-aq egde adamdar sııaqty táýekel tobyndaǵy adamdar vaktsınalaýdan ótip, qorǵanysqa ıe bolady. Al álemde koronavırýstan ólim-jitim 1%-ǵa deıin tómendeıdi».

Qytaıdyń úsh vaktsınasy, sonyń ishinde CNGB shyǵarǵan ekeýi jáne Sinovac Biotech Ltd jasaǵan bireýi tótenshe jaǵdaılar kezinde azamattyq maqsatta paıdalaný úshin maquldandy. Sinovac vaktsınasy Brazılııa men Indonezııada synaqtan ótýde.

Qytaıda shildeniń sońynda bastalǵan shuǵyl vaktsınalaý baǵdarlamasynyń aıasynda táýekel tobyndaǵy – medıtsına, keden jáne shekara qyzmetkerlerine, áskerı qyzmetshilerge, áýe kompanııalary men áýejaılar, sondaı-aq shetelge jumys isteýge baratyn adamdarǵa úsh tájirıbelik vaktsına qoldanylýda.