Vaktsına daýyna Saqtash Hasenovtiń qatysy joq - AShM

ASTANA. QazAqparat - Úkimettiń búgingi otyrysynda Aýyl sharýashylyǵy vıtse-mınıstri Qaırat Aıtýǵanov Sibir jarasyna qarsy vaktsınalardyń synaǵy boıynsha qylmystyq isterdiń qozǵalǵanyn jetkizdi.

Veterınarlyq baqylaý jáne qadaǵalaý komıteti tóraǵasynyń mindetin atqarýshy Tursyn Qabdoldanovtyń aıtýynsha, bul iske para úshin ustalǵan Saqtash Hasenovtyń qatysy joq, dep xabarlaıdy QazAqparat tilshisi.

Atalǵan vanktsınalardyń barlyǵy Qazaqstanda shyǵarylǵan. Onyń synamalaryn zertxanada tekserýdiń nátıjesinde vaktsınalardyń sapasyz ekeni anyqtaldy. «Jalpy, tekseris kezinde vaktsınalardyń qaýipsizdigi, tazalyǵy jáne aýrýǵa qarsy ımmýnıtettiń qalyptasýy zerdelenedi. Sol vaktsınalarda ımmýnıtet qýattylyǵynyń tómendigine, joqtyǵyna qatysty tıisti organdarǵa materıaldar jiberildi», - deıdi T.Qabdoldanov.

Onyń sózine qaraǵanda, vaktsınalardyń sapasyzdyǵy bıylǵy sibir jarasynyń ýshyǵyp ketýine sebep bolǵan joq. Óıtkeni aýrý mal kóp jaǵdaıda vaktsınamen egilmegen bolyp shyqty.

«Al osy iske veterınarlyq baqylaý jáne qadaǵalaý komıtetiniń tóraǵasy Saqtash Hasenovtyń qatysy bar ma?» degen suraǵyna onyń mindetin atqarýshy T.Qabdoldanov: «Bul máselege qatysy joq. Qazir tekserý jumystary júrgizilip jatyr», - dep jaýap berdi.
Aıta keteıik, jaqynda Sybaılas jemqorlyqqa qarsy is-qımyl ulttyq bıýrosynyń mamandary veterınarlyq baqylaý jáne qadaǵalaý komıtetiniń tóraǵasy Saqtash Hasenovty paramen ustady. Ol Qazaqstan aýmaǵyna et ónimderin kirgizýge ruqsat bergeni úshin aı saıyn para alyp otyrǵan.

Sonymen qatar kásipkerler aı saıyn Qazaqstanǵa kirgiziletin et ónimderiniń ár kelisi úshin Saqtash Hasenov pen onyń senimdi ókili E.Reshetkoǵa belgilengen baǵa boıynsha qarjy tólep kelgen. Hasenovtiń zańsyz qoldaýymen el aýmaǵyna 2016 jyldyń naýryz-qazan aılarynda 7,4 myń tonna qus eti eshbir kedergisiz kirgizilgen.

Osylaısha, Hasenov pen Reshetko 37 mıllıon teńge jymqyrǵan. Qylmystyq jolmen tapqan aqshasyn Saqtash Hasenov jeke basynyń paıdasyna jumsaǵan. Qazan aıynda ol salonnan jol talǵamaıtyn 2016 jylǵy Toyota Land Cruiser 200 avtokóligin satyp alǵan. Aýyl sharýashylyǵy mınıstri Asqar Myrzaxmetovtyń aıtýynsha, Saqtash Hasenovty qazirgi qyzmetinen áli bosatqan joq. Sebebi zań boıynsha sot sheshimi shyǵýy kerek.