Vaktsına bolmaǵanda álemde koronnavırýstan 31,4 mıllıon adam qaıtys bolatyn edi

NUR-SULTAN. QazAqparat - Vaktsına bolmaǵanda álemde koronnavırýstan 31,4 mıllıon adam qaıtys bolatyn edi. Bul týraly QR Úkimeti janyndaǵy Qazaqstanda koronavırýstyń taralýyna jol bermeý jónindegi vedomstvoaralyq komıssııasynyń Telegram kanalynan málim boldy, dep habarlady QazAqparat.

Kanaldaǵy málimetterge qaraǵanda, Bıologııa jáne medıtsına salasyndaǵy eń bedeldi ǵylymı basylymdardyń biri – brıtandyq The Lancet jýrnalynda jarııalanǵan jańa zertteýge sáıkes álem halqyn vaktsınalaý 2020 jyldyń jeltoqsany men 2021 jyldyń jeltoqsany aralyǵynda 20 mıllıonǵa jýyq adamnyń COVID saldarynan bolýy yqtımal ólim jaǵdaılarynyń aldyn aldy.

«Matematıkalyq modeldeýge súıene otyryp, zertteýshiler vaktsınalaý búkil álem boıynsha ólim sanyn eki esege azaıtady degen qorytyndyǵa keldi. Sarapshylardyń pikirinshe, vaktsınatsııasyz álemde 31,4 mıllıon adam koronavırýs ınfektsııasynyń áserinen qaıtys bolar edi»,-delingen habarlamada.

Sondaı-aq ótken táýlikte Reseıde COVID-19 ınfektsııasyn juqtyrǵan 1 102 adamnyń aýrýhanaǵa jatqyzylǵany belgili boldy. Bul aldyńǵy kúndegi 1 202-ge qaraǵanda 8,3%-ǵa azaıǵan, bul týraly koronavırýspen kúres jónindegi jedel shtabtyń habarlamasynda aıtylǵan.

Sonymen qatar aýrýhanaǵa jatqyzylǵandardyn sany 38 óńirde ósken, 39 óńirde azaıǵan, qalǵan segizinde jaǵdaı ózgermegen.

Sońǵy 24 saǵatta elde koronavırýs juqtyrǵan 3 154 adam tirkeldi. Kúnine 3 225 naýqas jazylyp, 65 adam qaıtys bolyp jatyr.

Reseıde pandemııanyń búkil kezeńinde 18 412 805 COVID-19 jaǵdaıy tirkelip, 17 839 346 adam aýrýdy jeńip, 380 774 adam qaıtys boldy.