Vaktsına alyp jatqan balalardyń ata-anasyn qandaı suraqtar jıi mazalaıdy
Osy oraıda QazAqparat tilshisi balalar vaktsınasynyń mańyzdylyǵy týraly elordadaǵy №1 qalalyq emhananyń balalar jáne áıelderdi emdeý bóliminiń basshysy Jamılıa Tanlashevamen áńgimelesken edi.
«Bizdiń emhanadan vaktsınany kóbine 16-17 jastaǵy joǵary synyp oqýshylary alyp jatyr. Olar ata-anasymen keledi jáne bizden keńes surap jatady. Ata-analardyń jıi qoıatyn suraǵy, ekpeniń keri áseri qandaı, vaktsına qansha ýaqytqa deıin balany koronavırýstan qorǵaı alady jáne ekpe ǵylymı zertteýden ótken be degen saýaldy kóp qoıady. Árıne bizdiń mamandar ata-analar men jasóspirimderdiń suraǵyna jaýap berip jatyr. Osy ýaqytqa deıin balalar arasynda ekpe alyp keri áseri baıqalǵan jaǵdaı tirkelgen emes. Ázirge dárigerdiń kómegine eshkim júgingen joq», - dedi Jamılıa Tanlasheva.
Onyń aıtýynsha, búginde atalǵan emhanada vaktsına alý protsesi qarqyndy júrip jatyr.
«Balalardyń indetke qarsy ekpeni alǵany jón. Osy oraıda ata-analardy durys túsinýge jáne balasyna vaktsına saldyrýǵa keńes beremiz. Bizdiń balalar alyp jatqan AQSh-tyń Pfizer vaktsınasyn álemniń kóptegen elderi qoldanyp jatyr jáne ol ǵylymı zertteý men synaqtan ótken. Sondyqtan ata-analar ýaıymdap, qoryqpaý kerek. Biz balalarymyzdy indetten vaktsına arqyly ǵana qorǵaı alamyz», - deıdi ol.
Dárigerdiń málimdeýinshe, vaktsınaǵa qatysty jalǵan aqparat pen túrli qaýeset keıde qoǵamda túsinikpeýshilik týǵyzyp jatady.
«Vaktsına alǵannan keıin erekshe jaǵdaıda kútinýdiń qajeti joq. Degenmen 3 kún boıy dárigerdiń baqylaýynda bolǵan jón. Nemese bala ózin jaısyz sezinse, dárigerge júgingen abzal. Iá, balanyń mazasy ketip, ystyǵy kóterilýi múmkin. Biraq bul qalypty jaǵdaı, odan shoshynbaý kerek», - dedi balalar jáne áıelderdi emdeý bóliminiń basshysy.
Sondaı-aq, maman allergııasy bar jáne 12 jasqa tolmaǵan balalarǵa ekpe alýǵa bolmaıtynyn aıtty.
«Odan bólek, sozylmaly aýrýdyń asqyný jaǵdaıynda, vaktsına alatyn ýaqytta ystyǵy joǵary bolsa nemese ınfektsııamen aýyryp tursa vaktsına salýǵa tyıym salynady. Sol sııaqty vaktsına alatyn balanyń ımmýndyq júıesiniń qalypty bolýy da mańyzdy», - dedi J. Tanlasheva.
