Vaktsına alsa da, vırýs juqtyrýdyń sebebin ımmýnolog túsindirdi
NUR-SULTAN. QazAqparat – Densaýlyq mınıstrligi ótkizgen onlaın dáriste allergolog-ımmýnolog Rafaıl Rozenson vaktsına alǵannan keıin de vırýs juqtyrýdyń sebebin túsindirdi, dep habarlaıdy QazAqparat.
«Vaktsınanyń birinshi komponentin alyp, aýrý juqtyrǵandar týraly kóp oqyp ta, estip te júrmiz. Ondaı joly bolmaǵandar biren-saran ǵana. Ondaı adamdar ekpe almaı turyp aýrý juqtyrǵan. Osyny túsiný kerek. Ol vırýsty vaktsına almaı turyp kezdestirdi degen sóz. Sondyqtan, vaktsına alsa da aýyrǵan. Ondaı adamdardyń da ómirmen qoshtasýy óte sırek bolady. Bir-eki jaǵdaı bolǵanyn men de estidim. Vaktsına alǵannan keıin, aýyryp, kóz jumǵan. Biraq bular ilespe aýrýlary kóp, egde adamdar edi», - degen dáriger vaktsına alǵannan keıin keminde 10 kún saqtanyp júrý kerektigin eskertti.
«Eger adam vaktsına alǵannan keıin tym quryǵanda 10 kún ótken soń vırýsty jolyqtyrǵan bolsa, mundaı qaıǵyly jaǵdaı bolmaýshy edi. Vakıtsna alǵannan keıin vırýs neǵurlym kesh jolyqsa, aǵzaǵa soǵurlym jeńil bolady. Vaktsına birinshi kúnnen bastap qaýipsizdikke kepil bola almaıdy. Ekpe aldyń ba, alǵashqy 10 kúnde úıden shyqpa, vaktsınaǵa antıdene qalyptastyryp al», - deıdi maman.
Rafaıl Rozenson buǵan deıi vaktsına alǵanan keıin qaıtys bolǵan adamdardyń eshbirinde vaktsınany aýrýdy belsendirgeni týraly dálel joq degen pikir aıtty.
«Kóbinese adamdar eki faktordan kóz jumǵan. Ne qan quramyndaǵy tsıtokınderdiń kúrt artýynan, ne tamyr ishinde qannyń belsendi uıýynan qaıtys bolǵan. Atalǵan aqaýlardy vaktsına týǵyzǵany týraly bir de bir dálel joq. Al adam vaktsına alǵannan keıin 14 kún ótken kezde vırýs juqtyrsa ınfektsııa áldeqaıda jeńil ótedi», - dedi sarapshy.
