Vaktsına almaǵan adamdar koronavırýsty qaıta juqtyrýy múmkin - maman

ALMATY. QazAqparat - Aýyryp jazylǵan adamdardyń koronavırýsqa qarsy ımmýnıteti turaqsyz bolyp keledi. Bul týraly Almaty qalasy №8 emhananyń bas dárigeri Farıda Aǵybaeva málim etti, dep habarlaıdy QazAqparat tilshisi.

Onyń aıtýynsha, vırýstyń jańa nusqalarynyń paıda bolýy, naýqastardyń óz qaýipsizdigine uqypsyz qaraýy, alǵashqy ınfektsııa kezinde álsiz ımmýndyq jaýap, qalpyna kelgennen keıin IgG antıdeneleriniń jetkiliksiz mólsheri indetti qaıta juqtyrýǵa yqpal etedi.

«Dárigerler COVID-19 týraly áli de az biledi, buryn aýyrǵan adamnyń ımmýnıteti qanshalyqty uzaqqa jetetini týraly aqparat joq. Sondyqtan antıdenesi bar adamdar koronavırýspen qaıta aýyryp qalý múmkin be degen suraqqa naqty jaýap berý óte qıyn, óıtkeni COVID-19 qozdyrǵyshy búgingi kúni nashar zerttelip otyr», - deıdi Farıda Aǵybaeva.

AQSh sarapshylary men vırýsologtarynyń pikirinshe, COVID-19 dertin jeńgen patsıentterdiń úsh toby bar: kúshti, álsiz jáne ortasha.

Birinshi top myqty, oǵan jańa koronavırýspen aýyratyndardyń barlyǵy kiredi.

Ǵalymdardyń pikirinshe, olardyń ımmýnıteti keıinirek juqtyrǵan jaǵdaıda SARS-CoV-2-men jaqsy kúresedi.

«Mundaı ımmýnıteti bar adam kovıdti birneshe ret juqtyrýy ekitalaı. Ekinshi top álsiz, bul topqa kovıdti jıi juqtyrǵan naýqastar jatady ári olarda vırýsqa qarsy antıdene joq. Bul jaǵdaıda adam aýrýdy jeńe alady, biraq dene jasýshalary ony «esine túsirmeıdi», jańa ınfektsııaǵa antıdene paıda bolmaıdy jáne qaıta juqtyrǵan jaǵdaıda COVID-19 joıýǵa kómektese almaıdy», - deıdi dáriger.

Onyń aıtýynsha, naýqas taǵy da aýyryp qala ma, joq pa, ol ınfektsııamen kezdesken sáttegi ımmýnıtettiń jaı-kúıine baılanysty bolady.