Vaktsına alǵanyma bir apta boldy, kóńil-kúıim jaqsy – medıtsına mamany
KÓKShETAÝ. QazAqparat - Vaktsına alǵan bir aptanyń ishinde kóńil-kúıime keri áserin tıgizetin jaǵdaı bolǵan joq. Bul týraly Kókshetaý qalasyndaǵy bastapqy medıtsınalyq-sanıtarlyq kómek kórsetý ortalyǵynyń aýmaqtyq bólim meńgerýshisi Maqpal Aıtbaeva aıtty, dep habarlaıdy QazAqparat tilshisi
Dárigerdiń aıtýynsha, ózi jumys isteıtin emhanada vaktsınalaý naýqany aqpannyń 2-de bastaldy. Onyń ishinde alǵashqy legte 2 medbıke men 3 dáriger, barlyǵy 5 adam ekpe aldy. Barlyǵynda asqyný men aýytqý belgileri baıqalǵan joq. Kelesi qatarda taǵy 6 qyzmetker men 4 oqytýshyǵa vaktsına salyndy. Budan bólek, taǵy 15 qyzmetkerge vaktsına salý josparlanyp otyr.
«Vaktsına salǵyzǵan adamnyń arterıaldy qysymy, basqa da ózgeristeri jarty saǵat boıy baqylaýda bolady. Sonymen birge, úsh kún boıy aýyr jumys istemeýi, alkogoldik ishimdik ishpeýi jáne vakıtsına salǵan jerge sý tıgizbeýi tıis. Ózim vaktsına alǵannan beri bir apta boıy dárigerdiń baqylaýynda boldym. Osy ýaqytta kóńil-kúıim jaqsy», - dedi Maqpal Aıtbaeva.
Sonymen qatar, ol vaktsınadan qorqýdyń qajeti joq ekenin, bul ekpe qazirgi epıdemıologııalyq jaǵdaıdy nazarǵa ala otyryp, adamdardyń koronavırýspen aýrýy men odan bolatyn ólim-jitim sanyn azaıtýǵa baǵyttalǵanyn atap ótti.
«Bizdiń qazir alyp otyrǵan vaktsınamyz «Gam-KOVID-vak» (Spýtnık V) eki komponentten turady. Aqpannyń 2-de biz birinshi komponentin alsaq, endi 21 kúnnen keıin ekinshi komponentin alamyz. Sonda biz vaktsınalaýdyń tolyq satysynan ótemiz. Vaktsına adamdardyń koronavırýske shaldyǵýynyń aldyna alýǵa jáne odan bolatyn ólim sanyn azaıtýǵa baǵyttalyp otyr», - dep tolyqtyrdy Maqpal Aıtbaeva.
Osy rette, ol vaktsına alýǵa kelisim bergen adamdar týraly málimetter arnaıy bazaǵa engiziletin jetkizdi.
«Bazada ol adamnyń arterıaldyq qan qysymy, júrek qaǵysy, dene qyzýy, ózge de qosymsha aýrýlary bar-joǵy týraly tolyq medıtsınalyq málimetteri bolady. Ony joǵary jaqtaǵy basshylar kez kelgen ýaqytta qarap baqylaı alady», - dep túıindedi Kókshetaý qalasyndaǵy bastapqy medıtsınalyq-sanıtarlyq kómek kórsetý ortalyǵynyń aýmaqtyq bólim meńgerýshisi Maqpal Aıtbaeva.
Aıta keteıik, Aqmola oblysynda vaktsına salý jumysy 24 egý pýnktinde júrgizilýde. Keıin qalǵan partııa túsken kezde qalǵan egý kabınetteri men kóshpeli brıgadalardy iske qosý josparlanýda. 1104 medıtsına qyzmetkeri jumysqa tartylyp, daıyndaldy. Qazirgi kezde, oblys boıynsha 500-den astam aqmolalyq koronavırýs ınfektsııasyna qarsy vaktsına alǵan.
