Vaktsına alǵandar da maska taǵyp júrýi kerek - komıtet tóraǵasy

NUR-SULTAN. QazAqparat – QR DSM sanıtarlyq-epıdemıologııalyq baqylaý komıtetiniń tóraǵasy Aıjan Esmaǵambetova maska taǵyp júrýdiń áli de ózekti ekenin eske saldy, dep habarlaıdy QazAqparat.

«Maska taǵý qazirgi jaǵdaıda ǵana emes, pandemııa jarııalanǵannan sátten beri ózekti. Vaktsına aldyq, endi maska taǵýdyń, qashyqtyq saqtaýdyń qajeti joq dep oılaıtyndar qatelesedi. Ázirge ujymdyq ımmýnıtet qalyptasqan joq, vırýs qoǵamda joǵary deńgeıde taralyp jatyr, ókinishke oraı, vaktsına alǵandar da aýyryp qalýy múmkin», - dep atap ótti Aıjan Esmaǵambetova Ortalyq kommýnıkatsııalar qyzmetinde ótken brıfıngte.

Sondyqtan, onyń aıtýynsha, vaktsınamen qatar aldyn alý sharalaryn da saqtaý mańyzdy.

«Ózińiz týraly, jaqyndaryńyz ben qart týystaryńyz týraly oılanyńyz. Delta shtamynyń da áldeqaıda juqpaly, kóp adamǵa tez taralatynyn jáne aýrý kúrdeli jaǵdaıda ótetinin este saqtańyz. Qurmetti qazaqstandyqtar, ótinemiz, barlyq aldyn alý sharalaryn saqtańyzdar», - dedi A. Esmaǵambetova.

Buǵan deıin Aıjan Esmaǵambetova vaktsınalaý týraly pasportty satyp alǵandarǵa úndeý joldap, ony reanımatsııaǵa joldama alǵanmen teń degen edi.