Vaktsına alǵan jambyldyqtardyń sany 342 myńnnan asty

TARAZ. QazAqparat – Jambyl oblysynyń ákimi Berdibek Saparbaevtyń tóraǵalyǵymen koronavırýstyń aldyn alý jónindegi shtabtyń kezekti otyrysy ótti, dep habarlaıdy QazAqparat tilshisi.

Jıynda óńirdegi epıdemıologııalyq ahýal, vaktsınatsııalaý barysy jáne monıtorıng toptarynyń jumysy qaraldy

«Osydan bir apta buryn ótken jıynda jaǵdaıdy jaqsartý, ekpe egý qaraqynyń arttyrý jáne monıtorıng toptarynyń jumysyn kúsheıtý boıynsha orynbasarlaryma, qala, aýdan ákimderi men basqarma basshylaryna naqty tapsyrma bergen bolatynmyn. Degenmen, ol tapsyrmalar tıisti deńgeıde oryndalmaǵanyn kórip otyrmyz. Qazirgi tańda oblysymyzda KVI juqtyrǵandardyń sany 16 700-den assa, ótken táýlikte 191 adam dertke shaldyqqan. Infektsııalyq statsıonarlardaǵy tósekterdiń toltyrylýy 58 paıyzdy qurasa, jansaqtaý bólimi boıynsha 43 paıyzǵa jetip otyr. Jalpy, ahýal máz emes. Ásirese, Taraz qalasyndaǵy jaǵdaı kóńil kónshitpeıdi», - dedi aımaq basshysy.

Jambyl oblysyndaǵy epıdemıologııalyq jaǵdaıdy baǵalaý matrıtsasyna sáıkes, Taraz qalasy, Shý jáne Qordaı, Talas aýdandary «qyzyl» aımaqta desek, Jambyl, Jýaly, Baızaq, Sarysý jáne T.Rysqulov aýdandary «sary» aımaqta ornalasqan. Al, Merki men Moıynqum aýdandary «jasyl» aımaqta.

Berdibek Saparbaev oń nátıjege qol jetkizý úshin vaktsınatsııalaý jumystaryn jedeldetý mańyzdylyǵyn basa aıtty.

Jalpy oblys boıynsha, 582 000 adamdy ekpemen qamtý josparlansa, búgingi kúnge deıin 342 142 tulǵa ekpe alyp, 58,8 paıyzǵa jetken. Oblystyq kórsetkishten tómen qalyp otyrǵandar: Taraz qalasy – 48,9 paıyz, Shý aýdany – 56,7 paıyz, Qordaı aýdany – 57,8 paıyz.

«Qazirgi tańda Taraz qalasy boıynsha vaktsına alǵandar sany 146 357 adamǵa jetip otyr. Biz bul kórsetkishke ótken aptada bizge berilgen 170 myń adamnyń tizimine sáıkes árbir meken-jaı boıynsha úılerdi aralap, bazaǵa enbeı qalǵan nemese ózge óńirlerden vaktsına qabyldap kelgen adamdardyń tizimin jańarttyq. Atalǵan jumys áli kúnge deıin jalǵasyn taýyp, osy aptada tolyǵymen aıaqtaý kózdelýde», - dedi óz sózinde Taraz qalasynyń ákimi Erjan Jylqybaev.

Aımaq basshysy, tıisti mınıstrlikpen jáne statıstıka agenttigimen júıeli jumystyń joqtyǵyn alǵa tartty. Qoǵamdyq kólik, bazar, iri saýda oryndarda maska rejıminiń saqtalmaı otyrǵanyn, turǵyndardyń kirip-shyǵýy Ashyq baǵdarlamasy boıynsha júzege aspaı otyrǵanyn kórsetip, monıtorıng toptarynyń jumysyn synǵa aldy.

«Men ózimniń tıisti orynbasarlaryma osy boıynsha kúnine eki ret jıyn ótkizýdi tapsyramyn. Tańerteń berilgen tapsyrmanyń keshke oryndalý kórsetkishin saralap otyryńyzdar. Olaı bolmaǵan jaǵdaıda, nátıje qol jetkize almaımyz», - dep túıindedi oblys ákimi.