Vaktsına alǵan jambyldyqtardyń sany 262 myńnan asty
TARAZ. QazAqparat – Vaktsına alǵan jambyldyqtardyń sany 262 myńnan asty. Bul týraly QR Prezıdenti Qasym-Jomart Toqaev ótkizgen eldegi sanıtarlyq-epıdemıologııalyq ahýal jónindegi jumys keńesinde Jambyl oblysynyń ákimi Berdibek Saparbaev baıandady, dep habarlaıdy QazAqparat tilshisi.
Jalpy Memleket basshysynyń buǵan deıin júktegen tapsyrmalary óńirlerde qalaı júzege asyp jatqandyǵy týraly atalǵan jumys keńes otyrysy barysynda birqatar oblystar men qala ákimderi baıandady. Jambyl oblysynyń ákimi Berdibek Saparbaev ta Prezıdentke óńirimizdegi aýrýshańdyq kórsetkishi men atqarylyp jatqan jumystar týraly habarlady.
«Óńirimizde jalpy emıdemıologııalyq ahýal turaqty. COVID-19 indetiniń 10 778 jaǵdaıy tirkeldi. Ótken táýlikte KVI-diń 57 jaǵdaıy anyqtaldy. Jambyl oblysy qazir «sary» aımaqta tur. Búginde ekpeden ótkenderdiń sany 262 myńnan asty. Jalpy bizde 582 000 adam koronavırýs ınfektsııasyna qarsy vaktsınatsııadan ótý kerek. Qazirgi tańda ekpeden ótkenderdiń kórsetkishi 45 paıyz. Muǵalimder 96, dárigerler 98 paıyz ekpemen qamtyldy. Al tósek-oryndardyń paıdalanylýy 50 paıyz. Aýyr naýqastar júktemesi 40 paıyz. Búginde bizde rezervte 2750 tósek-oryn men 2 aılyq dári-dármekterdiń qory bar. Jaǵdaı baqylaýda. Endi barlyq múmkindikterdi paıdalanyp, sizdiń bergen tapsyrmańyzǵa sáıkes, halyqty ekpeden ótkizýge jumys istep jatyrmyz. Bıofarm mamandarymen, ınstıtýttyń basshylarymen jumys jasadyq. Osy aıda vaktsınanyń 100 myń, kelesi aıda 650 myń, qyrkúıek aıynda 1 mıllıon doza vaktsına shyǵarylatyn bolady. Basqa mamandardy oqytý jóninen de jumystar júrgizilip jatyr», - dedi Berdibek Saparbaev.
Keńes aıaqtalǵan soń, Prezıdent júktegen mindetterdi oryndaý joldary oblys ákiminiń tóraǵalyǵymen ótken jıynda taǵy bir pysyqtaldy. Onda Berdibek Saparbaev tıisti sala mamandaryna óńirdegi epıdahýaldy turaqtandyrý úshin jaǵdaıdy únemi baqylaýda ustap, naqty sharalar qabyldaý kerektigin eskertti.
«Memleket basshysy naqty tapsyrmalar júktep otyr. Endi sol tapsyrmalardy oryndaý úshin jumys isteýimiz kerek. Aýrýshańdyq deńgeıi Taraz qalasy men Talas, Qordaı, Baızaq aýdandarynda joǵary bolyp otyr. Sondyqtan mobıldi taptardyń jumysyn kúsheıtý kerek. Ásirese, saýda ortalyqtary men restoran, kafe, bazarlardaǵy jaǵdaıdy baqylaýda ustap, jumysty jandandyrýǵa tıispiz», - dedi aımaq basshysy.
Berdibek Saparbaev orynbasary Dáýlet Káribekke qalanyń, aýdandardyń ákimderimen birlese osy jumystardy ary qaraı jalǵastyrýdy tapsyrdy.
«Kelesi másele – aýrýhanalardyń materıaldyq-tehnıkalyq jabdyqtarmen tıisti deńgeıde jabdyqtalýy. Biz qajetti qural-saımandarmen qamtamasyz etýimiz qajet. Bul eń negizgi jumys. Oblystyq densaýlyq saqtaý basqarmasynyń basshysy, aýdan, qala ákimderi osyny árdaıym baqylaýda ustasyn. Ókinishke qaraı, aýrýhanalarda jatqan naýqastardyń sany kún sanap ósip jatyr. Sol sebepti ákimder kún saıyn aýrýhanalarǵa baryp, jaǵdaımen tanysyp otyryńyzdar. Qajetti ottegi men dári-dármekter bar ma, sony baqylańyzdar», - dedi oblys ákimi.
