Vaktsına alǵan dárigerlerdiń úlesi 96 paıyzǵa jetti – ShQO
ÓSKEMEN. QazAqparat – Shyǵys Qazaqstan oblysynda COVID-19 ınfektsııasyna qarsy vaktsına alǵan dárigerlerdiń úlesi 96 paıyzǵa jetti, dep habarlaıdy QazAqparat tilshisi.
Óńirde kún saıyn vaktsına alǵandar sany artyp keledi. Bul jaıly aımaqtaǵy epıdemıologııalyq jaǵdaıǵa, vaktsınatsııalaý jumystarynyń júrgizilýine qatysty ótken keńes barysynda aıtyldy.
«Barlyq qyzmet kórsetý salasy mamandaryn, ıaǵnı, qoǵamdyq kólik, tamaqtaný, saýda oryndarynda jumys isteıtinderdiń vaktsına alýyn qadaǵalaý kún tártibinde tur. Bul densaýlyq saqtaý, bilim berý baǵytyndaǵy qyzmetkerlerge de qatysty. Qazirgi tańda oblysta dárigerler arasynda vaktsına alǵandardyń úlesi - 96, kúshtik qurylymdar qyzmetkerleri arasynda - 91, qyzmet kórsetý salasynda egilgen adamdardyń jalpy sany 66 paıyzdy qurap otyr. Bul jaqsy kórsetkish, biraq osymen toqtap qalýǵa bolmaıdy», - dedi oblys ákimi Danıal Ahmetov.
3 maýsymnan bastap Óskemen men Semeıde bes jyljymaly egý pýnkti jumys isteýde. Sondaı-aq Úrjar, Glýbokoe jáne Altaı syndy týrıstik aýdandarǵa erekshe nazar aýdarylýda.
«Byltyr Alakól jaǵalaýynda týrısterden PTR-anyqtamany mindetti túrde talap etý kerektigin engizgen kezde, bul sharany kásipkerler túsinbeı qalǵan bolatyn. Biraq keıin rızashylyqtaryn bildirdi. Ótken jyly aýdanǵa 600 myńǵa jýyq týrıst kelgen. Abyroı bolǵanda birde-bir naýqas tirkelgen joq», - dedi aımaq basshysy.
Onyń aıtýynsha, aımaqta vırýs juqtyrǵandar sany ortasha respýblıkalyq kórsetkishten tómen.
