Vaktsına adamzatty sheshek, oba sekildi pandemııalardan qutqaryp qalǵan - professor Qanatbek Muqanov
NUR-SULTAN. QazAqparat - Búgin ál-Farabı atyndaǵy QazUÝ-dyń oqytýshy-professorlyq quramy men qyzmetkerleri «Spýtnık V» ekpesin qabyldaı bastady, dep habarlaıdy QazAqparat atalǵan JOO baspasóz qyzmetine silteme jasap.
Eń alǵash bolyp ekpe qabyldaǵan ál-Farabı atyndaǵy QazUÝ Túlekteri qaýymdastyǵynyń atqarýshy dırektory Kúlǵazıra Baltabaeva: «Ekpe saldyrý týraly habarlamany oqydym da esh oılanbastan meni tizimge qosýyn suradym. Óıtkeni, bul derttiń aldyn alý úshin óte qajetti qadam. Sońǵy ret tumaýǵa qarsy ekpe qabyldadym jáne búginge deıin bul aýrýǵa shaldyqpadym. Qazir de ekpege degen senimim mol. Ózim úshin ǵana emes, jaqyndarym úshin de bul óte mańyzdy sheshim» deıdi.
Medıtsına ǵylymdarynyń doktory, professor, QR jaratylystaný ǵylymdary akademııasynyń akademıgi Qanatbek Muqanov barsha qazaqstandyqtardy ekpe saldyrýdan bas tartpaýǵa shaqyrdy. «Men medıtsına tarıhyndaǵy nebir keseldiń emin tapqan ekpelerdiń tıimdiligi týraly zertteý jumystaryn jasadym. Ekpe – medıtsına salasyndaǵy ozyq ıdeıalardyń jemisi. Negizgi suraq vaktsınatsııa qajet pe, joq pa? Ekpeni ektirý kerek! Buǵan balama joq. Qazir áleýmettik jelilerde chıpter týraly jáne basqa da alypqashpa jalǵan aqparat órip júr. Oǵan senýdiń qajeti joq. Óıtkeni vaktsınalyq ekpe adamzatty sheshek, oba jáne basqa da aýyr pandemııalardan qutqaryp qaldy jáne ondaı dert vaktsınatsııadan keıin qaıtalanbady. Sondyqtan men barlyq azamattardy ekpe jasatýǵa shaqyramyn! Bul máselede eki oı týyndamaǵany abzal. Múmkin bolsa, ekpe saldyrǵan durys. Aldymen, ózińizden buryn, jaqyndaryńyz ben týystaryńyzdyń densaýlyǵyn oılaýyńyz kerek. Qurmetti otandastar, barlyqtaryńyzdy ekpe qabyldaýǵa shaqyramyn»,– dep, barlyq áriptesterine qoldaý bildirdi Qanatbek Muqanov.
QazUÝ prorektory Mehmet Arslan ekpe saldyrýdyń qoǵam aldyndaǵy úlken jaýapkershilik ekenin aıtady. «Men prorektor retinde qyzmet babymen jıi is-saparlarǵa baramyn. Ártúrli is-sharalar barysynda kóptegen jandarmen kezdesemin. Qyzmet babyna baılanysty ózimdi ózgeler úshin de jaýapty sezinemin. Sondyqtan, birden ekpe qabyldaýǵa sheshim qabyldadym. Stýdentterdiń de, oqytýshylardyń da amandyǵy úshin barlyǵymyz ekpe alýymyz qajet. Ásirese bilim ordasynda barynsha jaýapkershilikti sezinip, memleket tarapynan berilgen múmkindikti durys paıdalanǵan jón» degen oıymen bólisti.
QazUÝ medıtsınalyq ortalyǵyna ázirge 50 ekpe berilgen. Kelesi lekke 600 ekpe beriletin bolady. Eriktilerdi ekpemen tolyq qamtý josparlanyp otyr.
Aıta keterligi, «Spýtnık V» – álemdegi alǵash tirkelgen, tıimdiligi 90%-dan asatyn úsh ekpeniń biri. Onyń tıimdiligi 91,6%-dy kórsetken, bul málimet 19 866 eriktige synaq júrgizilgennen keıin alynǵan. Qazaqstan – bul ekpeni tirkegen álemdegi 27-shi memleket. Elimizde 1 aqpannan bastap azamattarǵa koronovırýstyq ınfektsııaǵa qarsy ekpe salý bastalǵan bolatyn.
Nıkolaı Gamaleı atyndaǵy epıdemıologııa jáne mıkrobıologııa ǵylymı-zertteý ortalyǵy jasaǵan Gam-KOVID-Vak nemese «Spýtnık V» vaktsınasy ımmýndyq reaktsııasyn kúsheıtý úshin 3 apta aralyǵymen eki ret salynady. Birinshi vaktsınamen 26 adenovırýs serotıpine negizdelgen vaktsına, al ekinshisimen 5 serotıp engiziledi. Ekpe salý erikti túrde júrgiziledi. Árbir azamat tańdaý quqyǵyna ıe. Erikti túrde sheshim qabyldap, aldyn alý úshin áreket jasaý qazirgi tańda aýrýdan qutylýdyń jalǵyz joly bolyp tabylady.
