Vakansııalar men tólemder týraly málimetter smartfon arqyly qoljetimdi
Atalǵan vedomstvonyń Facebook-tegi paraqshasynda jarııa etilgen aqparatqa sáıkes, onda azamattyń áleýmettik mártebesin tekserýge, shegerimder týraly, onyń ishinde jumysynan aırylý jaǵdaıyndaǵy tólemder týraly aqparatty alý múmkindigi bar. Platformada qaladaǵy ózekti, bos jumys oryndarynyń tizimi qoljetimdi, sondaı-aq túıindemeni jiberýge bolady.
«Eńbek mınıstrligi, qala ákimdigi jáneAstana Innovations birlesken jumysynyń nátıjesinde Smart Astana mobıldik qosymshasy enbek.kz portalymen sınhrondaldy. Sondyqtan elordalyq jumys berýshilerdiń bos jumys oryndarynyń tizimi kún saıyn jańartylyp otyrady. Jumysty naqty laýazymdy nemese kompanııa ataýyn kórsete otyryp izdeýge, sonymen qatar usynystar tizimin qarap shyǵýǵa múmkindik bar. Suranysqa ıe bos jumys oryndarynyń arasynda orta mektep muǵalimderi, ádiskerler, kolledj muǵalimderi, tárbıeshiler, dárigerler, meıirgerler, hatshylar, elektrıkter men avtoslesarlar, kúzetshiler, bólme tazalaýshylar kiredi. Negizinen qyzmetkerlerdi tolyq jumys kúnine izdeıdi, ortasha eńbek ótili – 2-3 jyl. «Túıinde» qosymsha paraǵynda talapkerler ózderi týraly barlyq derekterdi toltyryp, ornalastyra alady. Jumys berýshi ózine laıyqty qyzmetkerdi izdeý úshin qosymshany paıdalana alady», - delingen mınıstrlik habarlamasynda.
Áleýmettik tólemderdiń mártebesin tekserý atalmysh qosymsha men Memlekettik áleýmettik saqtandyrý qorynyń birlesken qyzmeti nátıjesinde múmkin bolyp otyr. Ol úshin «Qalalyq qyzmetter» bólimine ótip, «Áleýmettik tólemder mártebesi» belgishesin basqan soń JSN engizip, aýdarymdar túrin tańdaý qajet. Mysaly, eger adam jaldamaly jumysker bolsa, onda aı saıynǵy jarnalar men áleýmettik medıtsınalyq saqtandyrý jelisi boıynsha aýdarymdardy jumys berýshi tóleıtin bolady. Júıe bul týraly paıdalanýshyǵa dereý habarlaıdy. Eger platformada adamnyń áleýmettik mártebesi týraly eshqandaı aqparat kórsetilmese, ol mundaǵy jaǵdaıdy saýalnamany toltyrý arqyly túzete alady.