Vahsh GES-indegi yqtımal apat birneshe elge qaýip tóndirýi múmkin: Ortalyq Azııa elderi kelissóz júrgizdi
ASTANA. KAZINFORM -Dýshanbede Ortalyq Azııa elderiniń tótenshe vedomstvolary basshylarynyń Vahsh GES kaskady nysandaryndaǵy yqtımal tótenshe jaǵdaılarǵa daıyndyq máselelerine arnalǵan kezdesýi ótti, dep habarlaıdy QR Tótenshe jaǵdaılar mınıstrliginiń baspasóz qyzmeti.
Kelissózderge Qazaqstan Respýblıkasynyń Tótenshe jaǵdaılar mınıstri general-leıtenant Shyńǵys Árinov jáne Tájikstan, Qyrǵyzstan men Ózbekstan tótenshe vedomstvolarynyń basshylary qatysty.
Talqylaýdyń negizgi taqyryby gıdrotehnıkalyq qurylystardyń qaýipsizdigi, qulaqtandyrý júıelerin damytý men tabıǵı jáne tehnogendik qaýip-qaterler týyndaǵan kezde kelisilgen áreket jasaý sharalaryn ázirleý máseleleri boldy. Taraptar transshekaralyq qaýip- qaterler týyndaǵan kezde jedel aqparat almasý tetikteri men shuǵyl qyzmetterdiń is-qımyldaryn úılestirý máselelerin qarastyrdy.
Kezdesý barysynda Vahsh GES kaskady nysandaryndaǵy yqtımal tótenshe jaǵdaı Tájikstan, Qyrǵyzstan jáne Ózbekstan aýmaqtaryna áser etýi múmkin ekeni atap ótildi. Osyǵan baılanysty halyqaralyq ózara is-qımyl jáne jedel áreket etýge birlesken daıyndyq máselelerine erekshe nazar aýdaryldy. Qazaqstan yqtımal tótenshe jaǵdaılardyń saldaryn joıýǵa qatysý úshin qutqarý bólimshelerin jiberýge daıyn ekenin rastady.
Kezdesý qorytyndysy boıynsha taraptar yntymaqtastyqty odan ári nyǵaıtýǵa, birlesken oqý-jattyǵýlar ótkizýge, tótenshe jaǵdaılardyń aldyn alý jáne olardy joıý salasyndaǵy praktıkalyq ózara is-qımyldy damytýǵa múddeli ekenderin bildirdi.
Osyǵan deıin TJM qutqarýshylary seısmıkalyq qaýipter boıynsha halyqaralyq jattyǵýǵa attanǵany týraly jazdyq.
