Vagondardyń elektrondyq bırjasy qurylady - BQA
ASTANA. 16 qyrkúıek. QazAqparat - Básekelestikti qorǵaý agenttigi vagondardyń elektrondyq bırjasyn qurýdy usynady. Búgin Parlamenti Májilisinde ótken Úkimet saǵatynda Básekelestikti qorǵaý agenttiginiń tóraǵasy Bolatbek Qýandyqov osylaı málimdedi.
Agenttiktiń taldaýyna qaraǵanda, elimizdegi tsement pen avıatsııalyq kerosın naryǵynda, ınternet jelisine qosylý jelisiniń bólshek saýda naryǵynda básekelestik jetkilikti deńgeıde damymaǵanyn kórsetken. Sol sekildi taldaý nátıjesi boıynsha domınanttar reestrine engizilgen vagon operatorlyǵymen aınalysatyn qazaqstandyq sýbektilerge qoldanylatyn baǵalyq retteý sharasy sheteldik operatorlardyń retteý tetigine qaraǵanda tıimsiz ekenin kórsetken. «Sebebi Keden odaǵyna múshe ózge elderde osy qyzmet salasyndaǵy jumys jasaıtyn operatorlarǵa bizde qoldanylatyn tarıftik retteý sharalary qarastyrylmaǵan. Osyǵan baılanysty agenttik Qazaqstanda «elektrondyq aqparat alańyn», ıaǵnı vagondardyń elektrondyq bırjasyn qurýdy usynady. Bul qazaqstandyq júk tasymaldaýshylardyń qyzmetiniń ashyqtyǵy men tıimdiligin arttyrýǵa jáne júk vagondarynyń paıdalaný qyzmetiniń qunyn tómendetýge múmkindik berer edi», - deıdi B. Qýandyqov.
Onyń sózine qaraǵanda, AI-80, AI-92-93 markaly benzın jáne dızel otynyn bólshek saýdada ótkizý naryǵynda da birqatar túıindi máseleler barshylyq.
