Vagondaǵy órt: Poıyz jolaýshylaryna bılet aqshasynyń bir bóligi qaıtarylady

ALMATY. QazAqparat - «Astana-Petropavl» baǵytyndaǵy poıyz jolaýshylaryna basqa poıyzǵa aýysyp minýine baılanysty bılet aqshasynyń bir bóligi qaıtarylady. Olar Astana vokzalynan Petropavl stansasyna standartty vagondardan turatyn basqa poıyzben jóneltildi, dep habarlaıdy QazAqparat tilshisi.

«Astana-Petropavl baǵyty boıynsha №901 qosymsha poıyzdyń jolaýshylaryna bılet qunynyń bir bóligi qaıtarylady», - dep habarlady «QTJ» UK» AQ baspasóz qyzmeti.

Sondaı-aq «Jolaýshylar tasymaly» AQ «Astana-Petropavl» baǵytyndaǵy № 901 poıyzdyń jolaýshylaryn tamaqpen qamtamasyz etti.

Eske salaıyq, búgin tańǵy saǵat 04.27-de «Almaty-Petropavl» baǵytyndaǵy №105 jolaýshylar poıyzy «Qaraǵandy-Astana» ýchaskesinde shuǵyl toqtaǵanyn jazǵan bolatynbyz.

Jolaýshylar «Myrza – Shoqaı» aralyǵynan Astanaǵa deıin jetip alýy úshin №3/4 «Almaty – Nur-Sultan – Nurly jol» (Talgo) poıyzyna otyrǵyzyldy.

Býrabaı kýrorty, Kókshetaý jáne Petropavl stantsııalaryna baǵyt alǵandar úshin Astana stantsııasynan Petropavl stantsııasyna deıin jeke quram uıymdastyryldy.

Poıyzda 184 jolaýshy bolǵan.

Tekserý júrgizý úshin «QTJ» UK» AQ komıssııasy quryldy.