Vaflıge salǵan: qyzylordalyq túrmedegi tanysyna esirtki alyp ótpek bolǵan
QYZYLORDA. KAZINFORM – Qyzylorda oblystyq qylmystyq atqarý júıesi departamentiniń №60 mekemesinde jazasyn óteýshige tanysy tyıym salynǵan zatty sálem-saýqat arasyna jasyryp alyp ótpek bolǵan.
Departamenttiń baspasóz qyzmeti habarlaǵandaı, mekeme qyzmetkerleri azyq-túlik ónimderin belgilengen tártippen tekserý barysynda vaflıdiń arasyna jasyrylǵan jasyl tústi, ózine tán ıisi bar belgisiz zatty anyqtady.
– Atalǵan derek boıynsha jedel tergeý toby shaqyrtyldy. Tárkilengen zatqa sot-hımııalyq saraptama júrgizildi. Saraptama qorytyndysyna sáıkes onyń jalpy salmaǵy 11 gramm esirtki ekeni anyqtaldy. Búginde Qylmystyq kodekstiń 296-babynyń 2-bóligine sáıkes sotqa deıingi tergep-tekserý júrip jatyr, – delingen habarlamada.
Al jýyrda Shyǵys Qazaqstan oblysynyń Ulan aýdanynda polıtseıler esirtki quramdy ósimdikterdi zańsyz ósirý deregin anyqtady.
