«Vafeldi» tańbasy bar qıylysta toqtaǵan júrgizýshige 3 AEK aıyppul salynady
ASTANA. KAZINFORM – Elimizde «vafeldi» jol tańbasy salynǵan qıylysta keptelis týdyryp, toqtap qalǵan júrgizýshiler ákimshilik jaýapkershilikke tartylady. Bul týraly Óńirlik kommýnıkatsııalar qyzmetinde ótken brıfıngte Astana qalasy Polıtsııa departamenti Ákimshilik polıtsııa basqarmasynyń bastyǵy, polıtsııa polkovnıgi Nurlan Ývaev aıtty.
Onyń sózinshe, «vafeldi» jol tańbasy qıylystyń bitelýine jol bermeý jáne kóliktiń kedergisiz qozǵalýyn qamtamasyz etý úshin engizilgen.
– Júrgizýshi qıylysqa ony toqtamaı tolyq kesip óte alatynyna kózi jetkende ǵana kirýi kerek. Eger alda keptelis bolyp, qıylysta toqtap qalý qaýpi bolsa, qıylysqa kirýge bolmaıdy, – dedi Nurlan Ývaev.
Onyń aıtýynsha, bul talapty buzǵandar Ákimshilik quqyq buzýshylyq týraly kodekstiń 594-babynyń 1-bóligine sáıkes 3 aılyq eseptik kórsetkish mólsherinde aıyppul tóleıdi.
Eske salaıyq, 25 tamyzdan bastap «Jol júrisi týraly» zańǵa engizilgen ózgerister kúshine enip, júrgizýshilerge qoıylatyn talaptar men jekelegen quqyq buzýshylyqtar úshin jaýapkershilik kúsheıtiledi.
