VADA Alvareske qatysty málimdeme jasady
ASTANA. QazAqparat - Erikti dopıng testileý qoǵamdastyǵynyń (VADA) prezıdenti Margaret Gýdman meksıkalyq boksshy Saýl Alvarestiń arnaıy baǵdarlamaǵa qujat tapsyrǵanyn rastady. «Taza boks» atty baǵdarlama Búkilálemlik boks keńesimen (WBC) birlesip júrgiziledi, dep xabarlaıdy QazAqparat.
«Biz mıster Alvarestiń ókilderinen tıisti qujattardy qabyldadyq. Endi, kúnine 24 saǵat, aptasyna 7 kún, jylyna 365 kúni, bylaısha aıtqanda, jyl boıy testileý júrgiziletin bolady», - dedi M.Gýdman.
Aıta ketken jón, búgin Saýl Alvares dopıng testileýden erikti túrde ótý týraly kelisimshartqa qol qoıǵanyn jarııalady. Oǵan sáıkes, boksshy kez kelgen ýaqytta synama tapsyrýǵa mindetteledi. Buǵan deıin Golovkınniń komandasy atalǵan mindetti aldaǵy revanshtyń basty talaby retinde qoıǵan bolatyn. Sebebi Nevada shtatynyń atletıkalyq komıssııasy ony alty aıǵa shettetse de, dopıng testterdi tapsyrýǵa mindettegen joq.
Saýl Alvares «Taza boks» baǵdarlamasyna kirgennen keıin eki jaqtyń ókilderi revansh boıynsha kelissózderdi bastady. «Tom Lefflermen kelissózderdi bastadyq. Biz rematchtyń bolǵanyn qalaımyz. Árbir myqty boksshy jyl saıyn VADA-nyń tekserýinen ótip otyrýy tıis. Óıtkeni bul - sportty tazartýdyń jalǵyz joly», - dedi Oskar de la Hoııa ESPN.com-ǵa bergen suhbatynda.
Sheteldik sarapshylardyń aıtýynsha, «Kanelo» AQSh-ta tanymal bolsa da, Golovkınsiz úlken ári tabysy mol jekpe-jekti uıymdastyra almaıtynyn jaqsy túsinedi. Sol sebepti GGG-diń talabyn oryndaýǵa májbúr boldy. Budan bólek, jankúıerler men jýrnalısterdiń qysymy qatty boldy. Barlyǵy onyń ádil boksshy ekenine kúdiktendi. Sebebi aqpan aıynda ol "klenbýterol" atty dopıngpen ustalsa da, birden erikti test tapsyrýǵa kelispedi. «Kanelo» VADA-nyń baǵdarlamasynan bas tartsa, biraz aqshadan qaǵylatynyn biledi. Sebebi qyrkúıek aıynda Golovkınge qarsy revansh ótpeıtin edi. GGG-diń ornyna Gerı O Salıvan sııaqty slaggermen bokstasýǵa týra keledi. Ol jekpe-jekten kóp paıdanyń túspeıtini belgili. Oǵan qosa, jankúıerlerdiń synyna ushyraısyń», - deıdi Boxingnews24.com saıtynyń jýrnalısi Shon Djons.
Foto: i.ytimg.com
