V12 dárýmeniniń jańa túri mı obyryn emdeýde tıimdi bolýy múmkin
ASTANA. KAZINFORM — V12 dárýmeni negizinde ázirlengen jańa qosylys mı obyrynyń eń qaterli túrleriniń biri sanalatyn glıoblastomany emdeýde tıimdi nátıjeler kórsetti. Bul týraly Oncoscience ǵylymı jýrnalynda jarııalanǵan zertteý qorytyndysynda aıtyldy.
Zertteýdi Nitric Oxide Services, LLC kompanııasynyń ǵalymy Djozef A. Baýer jetekshilik etken zertteý toby Klıvlend klınıkasyndaǵy Taýssıg onkologııalyq ortalyǵynyń mamandarymen birlesip júrgizdi.
Ǵalymdar V12 dárýmeniniń túrlendirilgen nusqasy sanalatyn nıtrozılkobalamındi (NO-Cbl) zerttedi. Bul qosylys azot totyǵyn tikeleı isik jasýshalaryna jetkizýge múmkindik beredi.
Glıoblastoma — mı obyrynyń eń agressıvti túrleriniń biri. Naýqasqa ota jasalyp, sáýlelik jáne hımıoterapııa júrgizilgenniń ózinde dıagnoz qoıylǵannan keıingi ortasha ómir súrý uzaqtyǵy kóbine 15 aıdan aspaıdy.
Janýarlarǵa júrgizilgen tájirıbeler barysynda NO-Cbl qosylysy mıdy qorǵaıtyn gematoentsefaldyq bógetten erkin ótip, isik tinderinde tańdamaly túrde jınalatyny anyqtaldy. Sondaı-aq jańa tásil isik jasýshalarynda keminde 24 saǵat boıy belsendi kúıinde saqtalyp, azot totyǵynyń uzaq ýaqyt áser etedi.
Zertteýler NO-Cbl qosylysyn temozolomıd preparatymen nemese tájirıbelik TRAIL terapııasymen birge qoldaný isik ósýin olardyń árqaısysyn jeke qoldanǵannan áldeqaıda tıimdi tejeıtinin kórsetti.
Zertteý avtorlarynyń pikirinshe, bul qosylys isiktiń emge tózimdiligin tómendetýge yqpal etip, qaterli jasýshalardyń joıylýyn jedeldetýi ári qazirgi qoldanystaǵy emdeý tásilderiniń tıimdiligin arttyrýy múmkin.
Sonymen qatar ǵalymdar ázirge bul nátıjeler tek klınıkaǵa deıingi zertteý kezeńinde alynǵanyn eskertedi. Sondyqtan jańa tásildi klınıkalyq tájirıbege engizbes buryn onyń tıimdiligi men qaýipsizdigin rastaý, ońtaıly dozasyn anyqtaý jáne áser etý mehanızmin jan-jaqty zerdeleý úshin qosymsha zertteýler qajet.
Eske salaıyq, buǵan deıin jyl sońyna deıin Qazaqstanda qaterli isikke qarsy alǵashqy otandyq preparat tirkeletini habarlanǵan bolatyn.
Aıta keteıik, Qazaqstanda onkologııalyq aýrýdyń aldyn alýǵa arnalǵan qospa ázirlenip jatyr.
Maqalanyń túpnusqasyn osy jerden oqı alasyz.
