V sanaty: Tabysy tómen bolsa da, otbasynyń aktıvteri tekseriledi
ASTANA. KAZINFORM — Eńbek jáne halyqty áleýmettik qorǵaý mınıstri Asqarbek Ertaev V sanatyna jatatyn otbasylardy baǵalaý tártibin túsindirdi.
Mınıstrdiń aıtýynsha, V sanaty — ekonomıkalyq turǵydan turaqty, jetkilikti deńgeıdegi otbasylar. Bul sanatqa jatqyzý úshin keminde eki belgi bolýy qajet.
Olardyń qatarynda:
• jan basyna shaqqandaǵy aılyq tabystyń 305 myńnan 356 myń teńgege deıin bolýy;
• birneshe jyljymaıtyn múliktiń bolýy;
• premıým sanattaǵy avtokólikke ıelik etý;
• orta bıznestiń bolýy;
• kommertsııalyq kóliktiń bolýy;
• aýyl sharýashylyǵy tehnıkasy, jer ýchaskeleri men mal basynyń bolýy.
Premıým sanattaǵy kólikter qataryna Mercedes-Benz, BMW, Audi, Lexus, Genesis jáne Toyota Land Cruiser markalary engizilgen.
— V sanaty ekonomıkalyq turǵydan turaqty otbasylardy qamtıdy. Olardyń qatarynda jeke jáne kvazımemlekettik sektordyń top-menedjerleri, joǵary jalaqy alatyn mamandar, kásipkerler men úlken aktıvterdiń ıeleri bar, — dedi A. Ertaev Ortalyq kommýnıkatsııalar qyzmetinde.
V sanatyndaǵy tabys ólshemine súıensek, tórt adamnan turatyn otbasynyń aılyq tabysy shamamen 1,2–1,4 mln teńge aralyǵynda bolady.
Alaıda otbasynyń sanatyn anyqtaǵanda tek tabys kólemi sheshýshi ról atqarmaıdy. Múlik pen ózge de aktıvter jıyntyǵy birge qaralady.
Mınıstrdiń málimetinshe, V sanatyna jatatyn otbasylar sany 1 mln 50 myń úı sharýashylyǵyna jetedi. Bul — eldegi barlyq úı sharýashylyǵynyń shamamen 15 paıyzy.
— Mysaly, kópbalaly otbasyn qosa alǵanda, segiz adamnan turatyn úı sharýashylyǵyn alaıyq. Bir adamǵa shaqqandaǵy tabys — 178 myń teńge. Kórsetkishtiń ózi V sanatynyń talabyna sáıkes kelmeıdi. Alaıda otbasynyń menshiginde jalpy aýdany 520 sharshy metr bolatyn eki úı, júk kóligi, 180 bas mal jáne 120 gektar aýyl sharýashylyǵy jeri bar. Bul aýqattylyqtyń tórt belgisi. ıAǵnı otbasynyń resmı tabysy salystyrmaly túrde tómen bolǵanymen, úlken aktıvteri bar. Sondyqtan tek jalaqyǵa qarap baǵalaý otbasynyń naqty materıaldyq jaǵdaıyn tolyq kórsetpeıdi, — dedi Asqarbek Ertaev.
Buǵan deıin A. Ertaev birde-bir muqtaj qazaqstandyq qoldaýsyz qalmaıtynyn aıtqan edi.
Al járdemaqy úshin ajyrasýdyń aldyn alý úshin bólek turatyn ata-analar da balanyń otbasy quramyna engiziledi.
Buǵan deıin Eńbek mınıstri «A» sanatynyń belgilerin ataǵan edi.
