V.Redkokashın: Bıýdjetti ońtaılandyrýdyń memlekettiń áleýmettik mindettemelerine esh zııany joq
ASTANA. QazAqparat - Membıýdjetti ońtaılandyrý memlekettiń áleýmettik mindettemelerine esh zııan tıgizbeıdi. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte QR Parlamenti Senatynyń depýtaty Vladımır Redkokashın aıtty.
«Úkimettiń keńeıtilgen otyrysy barysynda Qazaqstan Prezıdenti N.Nazarbaev bıýdjet shyǵystaryn ońtaılandyrý máselesine erekshe nazar aýdardy. Úkimetke 2015 jyly josparlanǵan shyǵystardy 10 paıyzǵa ońtaılandyrý tapsyryldy. Ońtaılandyrý memlekettiń halyq aldyndaǵy áleýmettik mindettemelerine zııanyn tıgizbeıdi: zeınetaqy, áleýmettik tólemder kólemi arttyrylatyn bolady. Aǵymdaǵy jyldyń 1 qańtarynan zeınetaqy mólsheri 9 paıyzǵa ósti, al zeınetaqynyń tómengi shegi qazirdiń ózinde 23692 teńgeni quraıdy. Ótken jyly ol 20782 teńge bolǵan edi», - dedi depýtat.
Sonymen qatar V.Redkokashın QR Prezıdentiniń memlekettik baǵdarlamalar aıasyndaǵy barlyq jobalarǵa jergilikti jetkizýshiler men óndirýshilerdi tartý arqyly júzege asyrý qajettigin tapsyrǵanyn eske saldy.
«Eń bastysy bul baǵdarlama 7,5 myń jańa jumys ornyn qurýdy kózdeıdi. Sonymen qatar otandyq óndirýshiler de qoldaýǵa ıe bolady. Óıtkeni, búginde qarqyn alǵan básekelestik bizdiń óndirýshilerimizge shynyǵyp, otandyq taýarlar men qyzmetter óndirisinde laıyqty oryn alýǵa múmkindik beredi», - dedi depýtat.
