V.Pýtın frantsýz akteri J.Depardege Reseı azamattyǵyn berdi
ASTANA. 3 qańtar. QazAqparat - RF prezıdenti Vladımır Pýtın frantsýz akteri, «Altyn globýs», «Sezar» syılyqtarynyń laýreaty, Qurmetti legıon ordeniniń kavaleri Jerar Depardeni reseılik azamattyqqa qabyldaý týraly jarlyqqa qol qoıdy. Atalmysh jarlyq búgin Kremldiń resmı saıtynda jarııalandy.
«Reseı Federatsııasy Konstıtýtsııasynyń 89-baby «a» tarmaǵyna sáıkes, 1948 jyly Frantsııada dúnıege kelgen Jerar Deparde Ksavıeniń Reseı Federatsııasy azamattyǵyna qabyldaý týraly ótinishi qanaǵattandyrylsyn», - delingen qujatta.
Este bolsa, ártis frantsýz azamattyǵynan 16 jeltoqsan kúni bas tartty. Buǵan eldegi sotsıalıst Fransýa Olland úkimetiniń kiriske 75 paıyz salyq engizý týraly bastamasy túrtki bolyp otyr. Keıin Frantsııanyń birqatar sheneýnikteri J.Depardeniń bul qylyǵyn «laıyqsyz» dep baǵalap, jerden alyp, jerge salyp, jazǵyrǵan da bolatyn.
Esesine J.Deparde ashyqhat joldap, endi onyń premer-mınıstrmen ortaq eli joq ekendigin, sonymen qatar ol ózin naǵyz eýropalyq jáne álem azamaty dep sanaıtyndyǵyn jazǵan. Sodan keıin kóp keshiktirmesten ártis Belgııadan jyljymaıtyn múlik satyp aldy. Sonan soń BAQ-ta, J.Deparde Chernogorııaǵa nemese Reseıge kóship kelý nıeti bar ekendigin habarlady. Bul aqparatty odan ári qyzdyrý úshin J.Deparde tipti Reseı Federatsııasynyń tólqujatyn V.Pýtınniń ózi salyp jibergendigin aıtyp qaljyńdady. 20 jeltoqsan kúni RF prezıdenti baspasóz máslıhaty barysynda osy oqıǵa jaıynda óz pikirin bergen bolatyn. «Eger Jerar turǵylyqty jerin Reseıge aýystyrǵysy kelse nemese reseılik pasportty alýǵa yntasy bolsa, bul másele oń sheshildi dep sanaı berińizder», - dedi V.Pýtın. «Biz Jerarmen kóp jolyǵyp turmasaq ta, aramyzda dostyq bar. Men onyń Frantsııany, frantsýz mádenıetin qanshalyqty qatty súıetinin bilemin. Sýretshini árkim-aq renjite alatyny belgili ǵoı. Bılikpen aradaǵy túsinispeýshiliktiń saldarynan, qazir Jerar Deparde óz ómirinde qıyn kezeńderdiń birin ótkerýde», - dep atap ótti RF basshysy.
«Sán-saltanat salyǵyn» engizý Reseıde áldeneshe ret talqylanǵan bolatyn. Alaıda búgingi tańda bul elde baılar basqa adamdarmen birdeı deńgeıde - 13 paıyz salyq tólep keledi.
