«Vetnamǵa Qazaqstannyń tájirıbesi qyzyqty kórinedi» - respýblıkalyq basylymdarǵa sholý

***

«Egemen Qazaqstan» basylymynyń búgingi sanyndaǵy «Joǵarydaǵylar ıek qaqsa, tómendegilerde nıet artady» taqyrybymen berilgen maqala Qostanaıda memlekettik til máselesine qatysty ótken óńirlik semınar - keńeske nazar aýdardy. 

Bıyl asqar Alataýdyń baýraıynan oryn tepken Qazaq ulttyq ýnıversıtetine - 75 jyl. Atalmysh basylymnyń osy nomerinde «Altyn uıa» taqyrybymen kórnekti qalamger Ábish Kekilbaıulynyń oı-tolǵanysy berilgen.

Tarıh qatparyna tereń úńilgen kelesi maqala «Er Jánibek» degen taqyryppen berilgen. Maqalada Abylaı hannyń oń tizesinen oryn alyp, tarıhta badyraıtyp iz qaldyrǵan Jánibek Berdáýletuly jaıynda sóz bolady.  

                                                     ***

Qazaq jerine vetnamdyqtar taban tiredi. Bul týraly tolyǵyraq  «Aıqyn» basylymynyń búgingi sanyndaǵy «Vetnamǵa Qazaqstannyń tájirıbesi qyzyqty kórinedi» degen taqyryptaǵy maqaladan oqı alasyzdar. «Vetnam Sotsıalıstik Respýblıkasynyń Úkimet basshysy Ngýen Tan Zýng óziniń qazaqstandyq áriptesimen kezdesip, keń aýqymda kelissózder júrgizdi. Jáne bul kelissózder jemisti bolǵan syńaıly», - deıdi basylym.

«Aqtóbedegi №1 qalalyq perınataldyq perzenthananyń mańynda sońǵy bir aıdyń ishinde kóńilge kúmán uıalatatyn daýystar shyǵa bastady. Turǵyndar «munda sekta jumys jasaıdy» dep topshylap ta úlgerdi. «Munda koreı sektasy jasyryn jumys jasap jatyr» degen de qaýeset jeldeı esti. Shynymen de, tańǵy saǵat tórtten bul mańda kún saıyn nelikten uzaq kezek túziledi?»

Osy saýaldyń jaýabyn izdegen «Aıqyn» gazeti «Kezdeısoq kelgen káristerden kúdiktenip otyr» degen maqalada kúdiktiń betin ashady.

Sondaı -aq atalmysh  basylymdaǵy  «Órtke qatysty úsh joramal bar» taqyrybymen berilgen maqala Taldyqorǵanda  bolǵan qaıǵyly oqıǵanyń sebebin qarastyrady.

***

«Bul máselege júrdim - bardym qaraýdy qoıyp, paraqorlyqqa belsheden batqan sheneýnikterden birjola qutylý kerek! Óıtkeni, sondaı jemqorlardyń «kómegimen» sońǵy kezderi orystar men qytaılarǵa Qazaqstan azamattyǵynyń satylyp jatqandyǵy qupııa bolýdan qaldy», - deıdi «Altyn orda» aptalyǵynyń búgingi sany. Bárimizdi oılandyratyn bul másele týraly «Qara qytaı qaptasa» degen maqaladan oqı alasyzdar.

Atalmysh basylymdaǵy «Sharana nege shetineıdi?» taqyrybymen berilgen kelesi maqala jas analardyń júregin eljiretip júrgen ózekti máseleni ortaǵa salady. «Eldegi ana men bala óliminiń azaımaı otyrǵany týraly kóptegen alqaly jıyndarda, basqosýlarda jıi aıtylyp ta júr. Sondaı-aq Parlament depýtattary bul problemaǵa nazar aýdaryp, Úkimetke, Densaýlyq saqtaý mınıstrligine depýtattyq saýal joldap ta jatady. Alaıda, ázirge shyǵyp jatqan nátıje az», -deıdi basylym.

***

«Alash aınasy» gazetiniń búgingi sanynda til polıtsııasyn qurý kerek pe degen qoǵamnyń ózekti saýaly «Oı-kókpar» aıdarynda talqyǵa túsedi. Astana qalalyq tilderdi damytý basqarmasynyń bastyǵy Orazgúl Asanǵazy «jol polıtsııasy belbeý taqpaǵandy tánińdi qorǵamadyń» dep aıyptaıdy, al tilin syılamaǵandy «rýhyńdy nege qorǵamaısyń» dep tártipke shaqyrsaq durys emes pe?» degen oı tastaıdy.

Atalmysh basylymdaǵy «Baıqońyr qazaqtary jalaqy úshin Reseı azamaty atanyp jatyr» taqyrybymen berilgen maqala Reseıge jalǵa berilgen nysanda sol eldiń azamaty retinde qyzmet etýshilerdiń aılyǵy qazaqstandyqtardan joǵary. Bul jaǵdaı «azamattyqty» ońaı aıyrbastap jiberýge ákep soqtyryp jatyr degen ózekti máseleni ortaǵa salady.

***

Qazaqstanǵa kelgen Vetnam Premer -mınıstriniń sapary orys tildi basylymdarda da keńinen kórinis tapty. Máselen, «Kazahstanskaıa pravda» gazeti eki el úkimet basshylary Astanada keshe qos memlekettiń bıznes ókilderi yntymaqtastyǵyna jol ashatyn birqatar kelisimderge qol qoıǵanyn jazdy. Bul taqyrypty «Lıter» men «EkspressK» basylymdary da jalǵastyrady.

Qazaqstannyń qoldanystaǵy baǵdarlamalary 13 ese qysqarady. Bul týrasynda,  «Lıter» gazeti habarlady. Atalmysh basylym keshe Indýstrııa jáne saýda mınıstri Áset Isekeshovti Memleket basshysy qabyldaǵanyn, mınıstr Qazaqstandy ınnovatsııalyq-ındýstrııalandyrý boıynsha tapsyrmalardyń oryndalý barysy týraly esep bergenin, al Elbasy qoldanystaǵy memlekettik baǵdarlamalardy ońtaılandyrýdy  tapsyrǵanyn jazady.

Keshe Taldyqorǵanda narkologııalyq dıspanserdegi órt saldarynan qaza tapqandar jerlendi, dep jazady «Vremıa» gazeti. Almaty oblysynyń ákimi serik Úmbetov osy qaıǵyly apatta qaza bolǵan úsh marqumnyń jerleý rásimine qatysty. Qalǵan marqumdardyń janazalaryna úkimettik komıssııa músheleri men oblys ákiminiń orynbasarlary qatysqan.