Vetnamdaǵy sý tasqyny: 36 adam mert bolyp, 12-si iz-túzsiz joǵalǵan
NUR-SULTAN. QazAqparat – Vetnamnyń ortalyq aýdandarynda nóser jaýynnan týyndaǵan sý tasqyny men kóshkin saldarynan 36 adam mert bolyp, 12 turǵyn iz-túzsiz joǵalyp ketti, dep habarlaıdy QazAqparat.
Vetnamdyq VnExpress onlaın-gazetiniń jazýynsha, 11 qazan kúni tańerteń «Lınfa» daýyly soǵyp, nóser jańbyr jaýǵan, saldarynan Vetnamnyń ortalyǵynda sý tasqyny kúsheıdi. Kóz jumǵandardyń kópshiligi eń qatty zardap shekken Kýangchı, Thyathen-Hıýe jáne Kýangnam provıntsııalarynyń turǵyndary.
14 qazanda kúndiz Vetnamnyń soltústik-ortalyq aýdanyna «Nangka» daýyly soǵady dep boljanǵandyqtan, bılik ókilderi áýejaı men jaǵjaılardy jabý týraly sheshim qabyldady. Vetnamnyń azamattyq avıatsııa basqarmasy Ngean provıntsııasyndaǵy Vın áýejaıy men Thanhoa provıntsııasyndaǵy Tho Sýan áýejaıy 14 qazanda jergilikti ýaqytpen tús mezgilinen 21.00-ge deıin jabyq bolatynyn eskertti.
Bıyl Vetnamda qýatty taıfýn, sozylmaly jaýyn-shashyn men sý tasqyny 98 adamnyń ómirin qıdy, tabıǵat apaty elge $217 mln-ǵa jýyq ekonomıkalyq shyǵyn ákeldi.
