Vetnamda sý tasqynynan kelgen ekonomıkalyq shyǵyn 55 mln. dollardan asty
HANOI. 15 qazan. QazAqparat /Rýslan Súleımenov/ - Vetnamda maýsymdyq jaýynnyń saldarynan týyndaǵan sý tasqynynda 24 adam qaza tapty, dep habarlady jergilikti BAQ. 60 myńnan astam úı sý astynda qaldy, tabıǵat apatynan kelgen ekonomıkalyq shyǵyn 55 mln. dollardan asty.
Boljam boıynsha, jaqyn arada Mekong ózenindegi sý deńgeıi áli de kóterile túspek, atalyp ótilgendeı, jaýyn-shashyn aıdyń sońyna deıin sozylady.
Ústimizdegi jyldyń qyrkúıek aıynan beri Ońtústik-Shyǵys Azııa memleketteri tabıǵat apattaryna jıi ushyrap otyr. Bul aımaqta sý tasqyny men taıfýndardyń saldarynan 650 -den astam adam qaza tapty, shamamen 8 mln. adam zardap shekti. Eń kóp zardap shekkender Taıland, Vetnam, Laos pen Fılıppınde.
