Vetnamda qýatty daýyl turyp, ondaǵan adam mert boldy
ASTANA. QazAqparat - Vetnamda bolǵan óte qýatty «Damrı» daýylynan 19 adam qurban bolyp, taǵy 12 adam iz-túzsiz ketken. Bul týraly Reuters agenttigi habarlady.
Tabıǵat apatynan 370-ten astam úıge zaqym kelip, júzdegen elektr baǵandary men aǵashtar qulady. 33 myń adam qaýipsiz aımaqqa kóshirildi. Buǵan qosa taıfýn 40 myń gektardy quraıtyn kúrish pen kaýchýk plantatsııalary sııaqty aýyl sharýashylyǵy alqaptaryn jaıpap ketti.
Daýyldyń jyldamdyǵy saǵatyna 90 km-di quraǵan. Aýa raıyna baılanysty 40 reıstiń ushyrylymy keıingi qaldyryldy. «Damrı» daýyly kýrortty Nıachang qalasyn da qıratyp ketti. Onda aldaǵy aptada Azııa-Tynyq muhıttyq ekonomıkalyq yntymaqtastyq uıymynyń forýmy ótýi tıis bolatyn.
