Vetnamda fınalǵa shyqqan qazaqstandyq boksshy qyzdardyń qarsylastary kim?
ASTANA. QazAqparat - Vetnamda ótip jatqan Azııa chempıonatynda fınalǵa shyqqan qazaqstandyq boksshy qyzdardyń qarsylastary belgili boldy, dep habarlaıdy QazAqparat QR boks federatsııasynyń baspasóz qyzmetine silteme jasap.
Keshe jartylaı fınalda qarsylasyn qapy qaldyrǵan 64 keli salmaqta el namysyn qorǵap jatqan Madına Nurshaeva men 69 keli salmaqtaǵy boksshymyz Valentına Halzova fınalǵa ótip, chempıondyq ataqqa bir taban jaqyndaǵan bolatyn.
Búgin Azııa birinshiliginiń sońǵy kúni. Eki boksshy da sanaýly saǵattardan keıin sharshy alańda qytaılyq qarsylastarymen aıqasyp, bas júldeni sarapqa salady.
Madına Nurshaeva fınalda qytaı ókili Dý Danmen judyryqtassa, Valentına Halzova qytaılyq Gý Hongpen aıqasady.
Esterińizge sala keteıik, keshe 51 kelide Nazym Qyzaıbaı, 75 kelide Darıǵa Shákimova, 81 kelide Móldir Bazarbaeva jáne aýyr salmaqta (+81) Lázzát Kúngeıbaeva Qazaqstan qorjynyna qola medal syılaǵan bolatyn.
