Vetnamda «Damrı» daýylynyń qurbandary 89 adamǵa jetti
ASTANA. QazAqparat - Vetnamdaǵy alapat tabıǵı apattar basylmaı tur. Keshe jergilikti «VnExpress» basylymy jarııalaǵan málimetke qaraǵanda, «Damrı» daýylynan qurban bolǵandardyń sany 89-ǵa jetip, taǵy 18 adam iz-túzsiz joǵalǵan.
Ótken demalys kúnderi Vetnamda qýatty «Damrı» daýyly turyp, onyń saldarynan sý tasqyny bolǵan. Osy tabıǵı apat eldegi bıyl bolǵan eń qýatty daýyldardyń biri bolǵan. Bılik ókilderiniń málimdeýinshe, 100 myńnan astam úıdi sý shaıyp ketken. Eń kóp zardap shekken Khanhoa provıntsııasy, onyń 37 turǵyny ajal qushqan.
Vetnam úkimeti ortalyq jáne ońtústik óńirlerde kemerinen asqan ózender sý qoımalarynda da tasqyn týyndatýy múmkin ekenin aıtady, onyń ústine keıbir aýdandardaǵy nóser de tolastamaı tur.
Osy apat bıyl Vetnamda bolǵan tabıǵı qubylystardyń ishinde eń kóp zııan keltirgeni boldy. Ótken aıda soltústik jáne ortalyq aýdandarda bolǵan sý tasqyny 70-ten astam adamnyń ómirin qıǵan bolatyn. Al qyrkúıekte ortalyq Vetnamda soqqan «Doksýrı» daýylynan 11 adam ajal qushty. Úkimet jyl basynan beri daýyl, sý tasqyny jáne kóshkin sııaqty tabıǵı apattardan 240-tan astam adam qurban bolǵanyn málimdedi.
