Vetnam radıosynda qazaq ánderi shyrqalady
ASTANA. QazAqparat - Qazaqtyń kúıleri men halyq ánderi Vetnam radıosynda áýeleıdi, al Qazaq radıosy tyńdarmandarǵa beımálim bolyp kelgen vetnam halqynyń áýenderin tanystyrady, dep habarlaıdy QazAqparat «Qazaq radıolary» JShS silteme jasap.
Bul týraly «Qazaq radıolary» JShS bas dırektory Mádı Manatbekuly men Vetnamdyq VOV3 mýzykalyq arnasy dırektorynyń orynbasary Tran Nhat Duong Astanada ótip jatqan «Azııanyń medıa dıalogy» forýmynda ýaǵdalasty. Odan bólek, qos tarap mádenıet pen týrızmdi damytýǵa baǵyttalǵan tyń jobalar ázirleýdi josparlap otyr.
«Vetnam radıosy «Qazaq radıolary» seriktestigi sekildi áleýmettik jáne qoǵamdyq baǵytta jumys isteıdi eken. . Vetnamdyqtardy bizdiń ulttyq jáne klassıkalyq mýzykamyz qyzyqtyryp otyr. Al, bizge olardyń týrızm baǵytyndaǵy baǵdarlamasy kerek. Óıtkeni, Vetnam - Qazaqstan úshin áli tolyq tanylyp úlgermegen el. Sondyqtan, eki eldiń radıolary mádenıet jáne saıahat salasyn qal-qaderinshe dáripteýge kelistik», - dedi «Qazaq radiolary» JShS bas dırektory Mádı Manatbekuly.
Óz kezeginde óz oıyn ortaǵa salǵan VOV mýzykalyq arnasy dırektorynyń orynbasary Tran Nhat Duong myrza bul ýaǵdalastyqtyń eki el arasyndaǵy mádenıet pen týrızmniń damýyna yqpal etetinin atap ótti.
«Qazaq elinde tabysty kelisim jasaǵanymyzǵa qýanyshtymyz. Qushaq jaıa qarsy alǵandaryńyzǵa aıtar alǵysymyz sheksiz. Bolashaqta osy kezdesýdiń qorytyndysy boıynsha eki tarap yntymaqtastyq týraly memorandýmǵa qol qoıatyn bolady. Bul qujat - eki eldiń memlekettik radıolary arasyndaǵy baıypty baılanystyń berik irgetasy bolyp qalanatynyna senimdimiz. Ekijaqty kelisim bolashaqta mádenıet pen týrızmniń damýyna ózindik septigin tıgizedi dep oılaımyz. Kezdesýge shaqyrǵandaryńyzǵa rahmet! Kezdesý qorytyndysy boıynsha kóp kúttirmeı birlesken jumysty bastaýǵa kirisemiz»,- dep rızashylyǵyn bildirdi ol.
Eske sala ketsek, Astanada tuńǵysh ret radıony damytý máselelerine arnalǵan «Radio Asia 2018» halyqaralyq konferentsııasy ótip jatyr. Oǵan Úndistan, Maldıv, Vetnam, Qytaı, Aýǵanstan, Túrikmenstan, Túrkııa, Indonezııa syndy Azııa elderiniń radıojýrnalısteri keldi.
