«Vetnam-Qytaı-Qazaqstan-Eýropa» transkontınentaldyq temir jol baǵyty iske qosyldy
HANOI. QazAqparat - Qazaqstannyń Vetnamdaǵy Elshiligi «Qazaqstan Temir Joly» UK» AQ-men (QTJ) Vetnam-Qytaı-Qazaqstan-Eýropa baǵyty boıynsha alǵashqy temir jol tranzıttik-kóliktik dáliziniń jumysyn iske qosqan kóliktik-logıstıkalyq jobany júzege asyrdy. Bul týraly QazAqparat QR Syrtqy ister mınıstrliginiń baspasóz qyzmetine silteme jasap habarlaıdy.
Alǵash ret Vetnam astanasy Hanoıdan (Ienven stantsııasy) vetnamdyq shekara mańyndaǵy Dongdang temir jol termınaly arqyly, Eýropaǵa birlesken konteınerlik quramdar qurylatyn QHR aýmaǵy boıynsha, odan ári Qazaqstan arqyly tranzıtpen Dýısbýrgke (GFR) kólemi 9,1 myń nemese 1686 JFE (jıyrma fýttyq ekvıvalent) júk tasymaly júzege asyryldy.
Osylaısha, Hanoıdan nemis Dýısbýrgine «LG» men «Samsung» kompanııalarynyń júkterin tasymaldaý merzimi 22 kúndi qurady, onyń 2 kúni taýardy Vetnamnan QHR-ǵa tasymaldaýǵa qajet boldy. Budan ári atalmysh júktiń Dýısbýrgke deıingi jetkizilimi 20 kún aldy. Keıinirek Vetnamnan Eýropaǵa deıingi júk tasymaldaýynyń jalpy ýaqytyn 19 saǵatqa deıin qysqartý josparlanyp otyr. «Vetnam temir joldarynyń» habarlaýynsha, kólemder bıylǵy jylda-aq aıtarlyqtaı artady.
Atalǵan temir jol baǵytynyń iske qosylýy Memleket basshysy Nursultan Nazarbaevtyń Qazaqstannyń kóliktik ınfraqurylymyn halyqaralyq kóliktik júıege ıntegratsııalaý jáne «Nurly jol» baǵdarlamasy aıasynda, Qytaı tarapynyń «Bir beldeý, bir jol bastamasymen ushtasatyn elimizdiń kóliktik áleýetin júzege asyrý boıynsha strategııalyq tapsyrmasyn júzege asyrý tájirıbesiniń nátıjesine aınaldy.
Qazaqstan men Vetnam arasyndaǵy Qytaı aýmaǵy arqyly tranzıtpen kóliktik-logıstıkalyq qatynasyn qurý jáne iske qosý jumysyna Vetnamdaǵy Qazaqstannyń Elshiligi men QTJ 2016 jyly bastamashylyq etti. Bul tapsyrmany 2016-2017 jyldary júzege asyrý úshin «QTJ» UK» AQ ókilderiniń Vetnamǵa sapary uıymdastyryldy, solardyń barysynda Vetnamnyń Kólik mınıstrliginiń jáne «Vetnam temir joldarynyń» jetekshilerimen kezdesýler uıymdastyryldy, sondaı-aq, 100-den astam iri álemdik jáne vetnamdyq kóliktik-logıstıkalyq kompanııalardyń qatysýymen eki bıznes-forým ótkizildi.
Budan bólek, QTJ mamandary Qytaımen shektesetin Dongdang jáne Laokaı temir jol ótkelderinde bolyp, olardyń atalmysh temir jol baǵytyn qurýdaǵy mán-mańyzy men áleýetin aıqyndady.
2017 jyldyń aqpanynda Hanoıda «QTJ» men «Vetnam temir joldary» arasynda Yntymaqtastyq jónindegi memorandýmǵa qol qoıylyp, ol eki el arasyndaǵy kóliktik-logıstıkalyq baǵyttaǵy ózara árekettestiktiń jandana túsýine yqpal etti.
Qazaqstandyq dıplomattardyń qoldaýy jáne QTJ ókilderiniń belsendi qatysýymen 2017 jyldyń naýryzy men shildesinde Almaty men Hanoıda Qazaqstan, Vetnam jáne Qytaıdyń temir jol ákimshilikteriniń alǵashqy úshjaqty kelissózderi júrgizildi. Nátıjesinde, taraptar tasymal kólemderi, baǵyttar jáne logıstıkalyq operatorlar jóninde kelisti. Atalmysh formattaǵy kelissózderdiń budan keıingi kezeńderine Reseı men Mońǵolııadaǵy seriktester qosyldy.
2018 jyldyń sáýirinde Qazaqstan men Vetnamnyń temir jol ákimshilikteriniń arasynda Kólik boıynsha jumys toby qurylyp, sátti qyzmet etip keledi.
Jalpy, Qazaqstan men Vetnamdy eki kóliktik baǵyt baılanystyrady: Vetnamǵa qazaqstandyq bıdaı tasymaly ótetin Lıanıýngan (KHR) kemejaıyndaǵy qazaqstandyq logıstıkalyq termınal, sondaı-aq, vetnamdyq Dongdang temir jol termınaly arqyly ótetin baǵyt.
Belgili bolǵandaı, Vetnam Eýrazııalyq ekonomıkalyq odaq (EAEO) elderimen Erkin saýda týraly kelisimge qol qoıǵan tuńǵysh el boldy. Qazaqstan-QHR-Vetnam tranzıttik baǵyty bizdiń elimiz ben ózge de EAEO elderine vetnamdyq naryqqa aýyl sharýashylyǵy taýarlaryn, onyń ishinde et-sút ónimderi men ózge de tez tasymaldaýdy qajet etetin taýarlardyń jetkizilimin jasaýǵa múmkindik beredi. Bul oraıda Iranǵa bıdaı jetkizilimi boıynsha Qazaqstan men Reseı arasyndaǵy birlesken jobalar úlgi bola alady. Óz kezeginde Vetnam atalmysh dálizdiń múmkindikterin paıdalana otyryp, teńiz ónimderi men tropıkalyq jemisterdi Qazaqstanǵa eksporttaý múmkindikterin alady.
Qazirgi ýaqytta Vetnam Eýropalyq Keńespen, Vetnam-QHR-Qazaqstan-Eýropa baǵyty boıynsha tranzıttik-kóliktik dálizdi ártaraptandyrýǵa, Vetnam men ASEAN elderinen Eýropaǵa júk tasymalyn qysqartýǵa múmkindik beretin , jalpy teńiz tasymalynyń balamasy bolatyn uqsas kelisim jasaý boıynsha jumystardy aıaqtaýda.
Vetnam- QHR- Qazaqstan-Eýropa tranzıttik-kóliktik dáliziniń qos tarapqa da keń kólemde qyzmet etýi keleshekte Qazaqstannyń óz kóliktik-tranzıttik áleýetin aıtarlyqtaı nyǵaıtýǵa jáne Eýropa men Ońtústik Shyǵys Azııa elderi arasyndaǵy tıimdi kópirge aınalýǵa múmkindik beredi.
2018 jyldyń qorytyndysy boıynsha, Qazaqstan men Vetnam arasyndaǵy taýar aınalymy 467,2 mln AQSh dollaryna jetti. Vetnam-QHR-Qazaqstan - Eýropa temir jol dáliziniń iske qosylýymen eki el arasyndaǵy taýar aınalymy aıtarlyqtaı artady dep kútilýde.
