V Dúnıejúzilik kóshpendiler oıyndarynyń tikeleı translıatsııasy qanshada bastalady

ASTANA. KAZINFORM – Búgin elordada saǵat 19:00-de Dúnıejúzilik kóshpendiler oıyndarynyń tikeleı translıatsııasy bastalady. 

V Dúnıejúzilik kóshpendiler oıyndary Astanada 8-13 qyrkúıek aralyǵynda ótedi. Oǵan álemniń 89 elinen 2500-den astam qatysýshy qatysady.

Sharanyń ashylý rásimi «Astana arena» stadıonynda ótedi.

QR Mádenıet jáne aqparat mınıstrliginiń habarlaýynsha, shoýǵa 3 myń artıst qatysady. Sharanyń ashylý rásiminiń aldynda, 8 qyrkúıek kúni saǵat 16:00-de qazaqstandyq estrada juldyzdarynyń qatysýymen kontsert ótedi. Kontsert aıaqtalysymen saǵat 19:00-de resmı ashylý saltanaty bolady. Shoý barysynda sahna men mýltımedıanyń zamanaýı tehnologııalary qoldynyla otyryp, eki saǵattyq mýzykalyq teatrlandyrylǵan qoıylym uıymdastyrylady.

Qalyptasqan dástúr boıynsha ashylý rásiminde sporttyq delegatsııalardyń sherýi ótedi. Sońynda Qazaqstannyń halyq ártisi Dımash Qudaıbergenniń oryndaýyndaǵy halyqtar dostyǵy men birligi týraly mýzykalyq kompozııatsııa oryndalady.

Oıyndarǵa qatysýshylar men qonaqtardy qabyldaý úshin 20 qonaqúı men 331 kólik qarastyrylǵan. Medıtsınalyq shtabta 150 medıtsınalyq qyzmetker, 23 veterınar jumys isteıdi. 1 300 volonter qyzmet atqarady. Sondaı-aq BAQ-qa arnalǵan akkredıtatsııaǵa jalpy 64 elden 1 185 ótinim túsken.

Oıyndar birneshe jerde ótedi: «Dýman» qonaq úıi, «Qazanat» ıppodromy, etnoaýyl, J. Úshkempirov atyndaǵy jekpe-jek saraıy jáne «Alaý» muzaıdyny men «Astana Arena» kesheninde.

Aıta keteıik, kóshpendiler oıynyn «Jibek joly» telearnasynan tikeleı efır arqyly tamashalaýǵa bolady.

Osyǵan deıin Dúnıejúzilik kóshpendiler oıyndary kezinde elordalyq medıtsınalyq uıymdar qalaı jumys isteıtinin jazdyq.

Kóshpendiler oıynynyń alǵashqy kúninde qandaı sport túrlerinen jarys ótedi.