V Dúnıejúzilik kóshpendiler oıyndaryna irikteý týrnırinde qatysýshylar úsh rekord ornatty
ASTANA. KAZINFORM – Elorda ákimdigi janyndaǵy Ortalyq alańda V Dúnıejúzilik kóshpendiler oıyndaryna eń myqty qazaqstandyqtar arasynda «Tolaǵaı» respýblıkalyq irikteý týrnıri ótti. Bul týraly Astana ákimdiginiń resmı saıty jazdy.
Týrnır aıasynda jarysqa qatysýshylar úsh rekord ornatty. Azamat Bektasov bir qolymen salmaǵy 82 kg gir tasyn 26 ret kóteredi. Baýyrjan Ábdihaım salmaǵy 40 kg bolatyn qoıdy arqasyna qoıyp, 5 myń ret otyryp turdy. Gınness rekordtar kitabynyń birneshe dúrkin rekordshysy Jamalı Dıhanuly taǵy bir rekord ornatty. Sportshy salmaǵy 3 tonna bolatyn kólikti 25 metr qashyqtyqqa súırep apardy.
Týrnırge elimizdiń ártúrli óńirlerinen iriktelgen 19 sportshy qatysady.
«Búgin Astanada 8-14 qyrkúıek aralyǵynda ótetin V Dúnıejúzilik kóshpendiler oıyndaryna respýblıkalyq irikteý týrnıri ótip jatyr. Álemniń 92 elinen 5 myńǵa jýyq sportshy keledi kútilýde. Búgingi týrnırde sportshylar bes saıys boıynsha baq synap jatyr. Jarys ulttyq sport túrlerin nasıhattaý maqsatynda ótkizilip jatyr. Búgingi týrnırge 19 myqty sportshy qatysyp, óz óńirleriniń namysyn qorǵap jatyr», - dedi QR Týrızm jáne sport mınıstriniń keńesshisi Dıas Ahmetshárip.
Sportshylar bes saıys boıynsha jarysady: uzyndyǵy 1,5 m temirdi jelkege maıystyrý, mejeli jerge deıingi qashyqtyqta salmaǵy 100 kg tasty kóterip aparý, salmaǵy 130 kg aýyr bóreneni ıyǵyna qoıyp, kóterý, 200 kg júk arbasyn súıreý, on keli naızany qashyqtyqqa laqtyrý.
«Munda eń myqty sportshylar jınaldy. Jarys ulttyq sport túrlerin damytý maqsatynda ótkiziledi. Kórip otyrǵanyńyzdaı, týrnır qala turǵyndarynyń úlken qyzyǵýshylyǵyn týdyrdy. Barlyq qala turǵyndary men qonaqtaryn Astana kúnimen quttyqtaımyn!» - dedi jobany uıymdastyrýshy Tımýr Spataev.
Uıymdastyrýshylardyń aıtýynsha, jarys jeńimpazdary qyrkúıek aıynda ótetin V Dúnıejúzilik kóshpendiler oıyndarynda el namysyn qorǵaıtyn bolady.
