V.Bojko Úkimetten Qyzylorda oblysynda taıaýda salynǵan sýda qutqarý stansysyna qatysty túıtkildi máseleni retteýdi ótindi
ASTANA. Tamyzdyń 24-i. QazAqparat /Marlan Jıembaı/ - Elimizdiń Tótenshe jaǵdaılar mınıstri QR Úkimetinen Qyzylorda oblysynda taıaýda salynǵan sýda qutqarý stansysyna qatysty túıtkildi máseleni retteýdi ótindi. Bul ótinishti atalǵan vedomstvonyń basshysy Vladımır Bojko búgin Úkimet úıinde ótken keńes barysynda jasady.
«Qyzylorda oblysynyń ákimdigi jańa stansyny mınıstrlik qaramaǵyna bere almaıtyndyǵyn alǵa tartyp otyr, bul meniń tańdanysymdy týdyrady. Óıtkeni onyń qurylysyna memleket bıýdjet aıasynan qarjy bóldi ǵoı jáne ol sýda qutqarý stansysy retinde salyndy. Al sýda qutqarý bólimsheleri ótken jyldan bastap bizdiń qaramaǵymyzǵa berilgen bolatyn. Sondyqtan olar nysandy oblystyq tótenshe jaǵdaılar departamentiniń qaramaǵyna berýleri kerek bolatyn, alaıda bul másele ashyq kúıinde qalyp otyr», dedi ol óz sózinde.
Sonymen qatar mınıstrdiń aıtýyna qaraǵanda, QR TJM sáıkes ótinishti oblys ákimdigine birneshe márte joldaǵan. Alaıda oń jaýapty áli kúnge deıin ala almaı otyr.
Aıta keteıik, ótken jyly Syrdarııa ózeninde qutqarý operatsııalaryn júrgizý maqsatynda smetalyq quny 172,1 mln. teńge bolatyn sýda qutqarý stansysy salynyp, iske qosylǵan bolatyn.
