V. Bojko: Astanadaǵy turǵyn úılerde sýdyń lastanǵany týraly qaýesetke alańdaýǵa esh negiz joq
ASTANA. QazAqparat - Búgin sý tasqyny qaýipterine baılanysty ótken baspasóz máslıhaty barysynda Іshki ister mınıstriniń orynbasary Vladımır Bojko Astana qalasyndaǵy sýdyń lastanýy týraly jurtshylyq arasynda tarap ketken qaýesetke jaýap berdi.
Eske salaıyq, buǵan deıin áleýmettik jelilerde Astanada tazartý stansalary sý tasqynynyń astynda qalǵandyqtan, apta sońyna deıin turǵyn úılerde sýdy paıdalanýǵa qatań tyıym salynatyndyǵy týraly qaýeset taralyp, úılerde aýyz sýdy múldem paıdalanbaý týraly keńester aıtylǵan.
Mınıstr orynbasary brıfıngte ondaı jel sózdiń shyndyqqa esh janaspaıtynyn alǵa tartady. Bul rette buǵan deıin de áleýmettik jelide «bank týraly jalǵan aqpar taratqan bireýdiń merzimge kesilgenin» eske salǵan V. Bojko, osy joly da tıistiler jazalanatynyn aıtyp qaldy.
«Qazir sý irkýish nysandardyń barlyǵy da bizdiń erekshe baqylaýymyzda tur. Sonyń ishinde sý irkýish nysannyń bireýin ýaqytsha toqtattyq, óıtkeni qater týdy, biraq sýdy baqylaý jumysy jalǵasýda. Sondyqtan da, sý rejımine nemese sýdyń sapasyna qatysty eshqandaı da buzylýshylyqtar oryn alǵan joq, alańdaýǵa esh negiz joq, sýdy ishe berýge bolady. Degenmen, basqa bir másele bar, ózenderden, daladaǵy qudyqtardan sýdy paıdalanǵanda muqııat bolǵan durys, ondaılarǵa qar sýy qosylýy yqtımal»,- dedi V. Bojko.
