V Azııa Para oıyndarynyń jeńimpazdary elge oraldy
ASTANA. KAZINFORM – Elordanyń halyqaralyq áýejaıynda 14 jeltoqsannan 15 jeltoqsanǵa aýǵan túni Birikken Arab Ámirliginde ótken jasóspirimder arasyndaǵy V Azııa Para oıyndarynyń jeńimpazdaryn saltanatty túrde qarsy alý rásimi ótti, dep jazdy qala ákimdiginiń resmı saıty.
10-13 jeltoqsan aralyǵynda ótken tórt jyldyqtyń keshendi jarysynda elimizdiń namysyn 9 sport túrinen 60 otandasymyz qorǵap, 68 medal jeńip aldy. Aıtýly jarysqa Astana qalasynyń sportshylary qatysyp, jeńis tuǵyrynan kórindi. Atap aıtqanda, para paýerlıftıng saıysynda Vazır Nadyrov 59 kg salmaq dárejesinde 115 kg nátıjemen synǵa túsip, úzdik úshtikke enip, qola medal ıelendi. Sondaı-aq, Qýanysh Rahatuly 54 kg salmaq dárejesinde 107 kg nátıjemen óner kórsetip, para paýerlıftıngten qola júldege qol jetkizdi.
Para ústel tennısinen aralas juptyq synda elordalyq Altynaı Erjanqyzy Elı Mahulbekovpen birge óner kórsetip, altyn medal jeńip aldy. Al jekeleı synda Altynaı qola medal ıelendi.
Para júzýden qatysqan eki birdeı astanalyq sportshy da jeńis tuǵyrynan kórindi. Atap aıtqanda, Ádil Qalıeva para júzýden jasóspirimder arasyndaǵy V Azııa Paralımpıada oıyndarynyń tórt dúrkin altyn júldegeri atandy. Ol 12-15 jas sanatynda óner kórsetip, tórt túrli qashyqtyqta jeńiske jetti: • 200 m keshendi júzý; • 100 m erkin stıl; • 400 m erkin stıl; • 50 m erkin stıl.
Al para júzýshi Turǵanbekov Álı 17-18 jas sanatynda synǵa túsip, bir altyn jáne eki kúmis medal ıelendi. Ol tómendegi qashyqtyqtarda júldeger atandy: • 100 m brass – altyn medal; • 100 m erkin stıl – kúmis medal; • 100 m shalqalap júzý – kúmis medal.
Osylaısha, Jasóspirimder arasyndaǵy Azııa Paralımpıada oıyndarynyń qorytyndysy boıynsha Astana qalasynyń sportshylary 6 altyn, 3 kúmis jáne 3 qola medal enshiledi. Jasóspirimder arasyndaǵy Azııa para oıyndarynyń deńgeıi ýaqyt ótken saıyn artyp keledi. Máselen, 2021 jyly Bahreındegi ótken dodaǵa 30 el bas qossa, bıyl rekordty kólemde 45 memleket júldege talasty. Aıta keterligi, Qazaqstan quramasy bul básekege 8 jyldyq úzilisten keıin qaıta qatysty.
2009 jyldan bastaý alǵan jasóspirimder arasyndaǵy Azııa para oıyndarynyń tarıhynda osyǵan deıin Qazaqstan quramasy 25 altyn enshilegen edi. Al Dýbaıdaǵy ótken V Azııa para oıyndarynda otandastarymyz 25 márte jeńis tuǵyryna kóterilip, elimizdiń Ánuramyzdy shyrqatty.
- 25 altyn alýdyń ózi ońaıǵa soqqan joq. Osynyń artynda júıeli jospar qurý, oqý-jattyǵý jıyndary, bapkerlerdiń eńbegi, sportshylardyń qanshama tókken teri jatyr. Eń bastysy, ulttyq quramanyń artynan erip kele jatqan rezervtiń deńgeıin tekserýge múmkindik aldyq jáne olar úlken tájirıbe jınady, – dedi Dene múmkindikteri shekteýli tulǵalarǵa arnalǵan sporttyq daıarlaý ortalyǵynyń joǵary jetistikter sporty jáne óńirlik damý jónindegi dırektordyń orynbasary Lesken Esekeev. Aıta keteıik, endi jasóspirimder arasyndaǵy kelesi VI Azııa Para oıyndaryn 2029 jyly Kambodja Koroldigi qabyldaıdy.
Aıta keteıik, qazaqstandyq jasóspirimder V Azııa Para oıyndarynda 68 medal jeńip aldy.