Uzynaǵashtaǵy qandy qylmysqa qatysty sot bastaldy
TALDYQORǴAN. QazAqparat - Almaty oblysynda mal satýǵa ketip, artynsha óli deneleri tabylǵan úsh aǵaıyndyny óltirgenderge qatysty sot otyrysy bastaldy.
Atalǵan isti talqylaý búgin Almaty oblysy Qarasaı aýdandyq sotynda júrip jatyr, dep habarlaıdy QazAqparat tilshisi.
Muqııat marqumnyń týǵan aǵasy Adal Zarylhan QazAqparat tilshisine bergen suhbatynda áli de is tolyǵymen ashylmady dep, ishteı ókinishin bildirdi.
«Ázirge eki adam ustaldy. Talǵat Súleımenov pen Murat Ońalbaev - naqty óltirýshiler. Al meniń bilýimshe, úshinshi kúdikti Baqyt Baıqamysov esimdi jigitti kýáger retinde tergeldi. Sol Baqyt qylmysqa kýáger bola tura, eshkimge ol jaıynda aıtpaǵan. Jáne osy jigit buryn isti bolǵan dep estidim. Biraq, bizdiń tergeý barysyna kóńilimiz tolmaıdy. Sybaılastary tolyq ashylmady dep sanaımyz», - deıdi Adal Zarylhan.
Esterińizge sala keteıik, úsh aǵaıyndy jigit Uzynaǵashqa mal satýǵa ketip, artynsha olardyń óli deneleri tabylǵan edi. Muqııat Zarylhan, Jarqynbek Doldan jáne Qadilbek Álimhannyń artynda 8 bala jetim, áıelderi jesir qaldy. Dúıim jurtty shýlatqan qandy qylmysty Іshki ister mınıstri ózi baqylaýda ustap otyr.
