Uzynaǵash pen Qapshaǵaıdan Almatyǵa poıyz qatynaıtyn boldy
ALMATY. QazAqparat - Almaty ákimdigi qalaǵa jaqyn mańdaǵy eldi mekenderge temir jol qatynasyn ashty, dep habarlaıdy QazAqparat tilshisi qalalyq ákimdiktiń baspasóz qyzmetine silteme jasap.
Uzynaǵash pen Qapshaǵaıdan 15 tamyzdan bastap poıyzdar qatynaıtyn boldy.
Baspasóz qyzmetiniń habarlaýynsha, Almatyǵa kún saıyn jaqyn eldi mekenderden jarty mln adam, 200 myń kólik kiredi.
Mundaı kóp kólik aǵyny qalanyń ekologııalyq ahýalyn qıyndata túsetini ras.
Syrt aýdandarǵa ketetin jolaýshylar tas joldy kúnde bógep, keptelis týdyratyny da belgili.
Qala bıligi osy máseleni sheshý maqsatynda Jambyl aýdany men Qapshaǵaı qalalary ákimderiniń usynysyn eskere otyryp, «Almaty1 - Uzynaǵash - Almaty» jáne «Almaty1 - Qapshaǵaı - Almaty» baǵytynda poıyz qatynasyn ashty.
Qapshaǵaı -Almaty temir joly 71 shaqyrymǵa sozylyp jatyr. Eki arada jolaýshylardy 6 vagon tasymaldaıtyn bolady. Jol arasy 1,5 saǵat. Poıyz 2 ret qatynamaq.
37 shaqyrymdyq Uzynaǵash baǵytynda 9 vagon júredi. Jetý ýaqyty shamamen 1,5 saǵat. Atalǵan poıyz da kúnine 2 ret Almatyǵa kelip ketedi.
Bul baǵytta qala ákimdigi demeýqarjy bólip qoıǵan.
«Demeýqarjy bólýdiń arqasynda jol aqysy 80 teńge bolady. Osylaısha júrdek poıyzdar eki araǵa qatynaıtyn jekemenshik tasymaldaýlarmen básekelestikke túse alady. Sondaı-aq, bolashaqta vagondarda «Ońaı» termınaly ornatylatyn bolady», - dedi baspasóz qyzmetinen.
